Page 4 - HOH

Diasabra, 23 Augustus 2025 AWEMainta
For di ansiedad pa soño:
Con cannabis medicinal por yuda pashentnan di alzheimer
MIENTRAS e poblacion mundial ta enbehece, demencia y
e malesa di Alzheimer a bira desafionan urgente di salud
publico. Mas cu 55 miyon hende rond mundo ta biba cu
demencia, segun Organisacion Mundial di Salud, y Alzheimer
ta representa 60–70% di e casonan ey. Famia y cuidadonan
ta lucha diariamente cu e efectonan: Perdida di memoria,
confusion, agitacion, y un reduccion den independencia.
Den e buskeda pa alivio, algun a acudi na un opcion contro-
versial y cu ainda ta den desaroyo—cannabis medicinal.
E realidad di demencia y alzheimer
Alzheimer ta un malesa progresivo y degenerativo di celebro
cu pocopoco ta destrui memoria y funcionnan cognitivo.
Pashentnan por lubida combersacionnan recien, perde e
habilidad pa reconoce sernan keri, y eventualmente rekeri
cuido full-time. Mas aleu di perdida di memoria, cambionan
den comportacion manera agresividad, ansiedad y insomnio
ta haci bida mas dificil tanto pa e pashent como pa e cuida-
donan.
Tratamento actual, incluyendo remedinan, por alivia sintoma
pero no por stop e progresion di e malesa. E bashi aki den
terapia efectivo a stimula interes den enfokenan alternativo.
Cannabis medicinal como opcion
Cannabis, particularmente compuestonan manera THC
(tetrahydrocannabinol) y CBD (cannabidiol), a haya aten-
cion pa su potencial pa maneha sintoma en bes di cura e
malesa. Investigacion, aunke limita, ta sugeri cu cannabis
por yuda reduci agitacion, mehora soño y alivia ansiedad
den pashentnan cu demencia.
CBD, e componente no-psicoactivo, ta specialmente prom-
etedor pa calma inkietud sin e “high” asocia cu THC. Algun
estudio ta señala tambe e propiedadnan anti-inflamatorio
y neuroprotectivo di cannabis, cu teoricamente por retrasa
aspectonan di e degeneracion di celebro.
Cuidadonan a comparti relatonan anecdotico di zeta of
spray di cannabis cu ta reduci agresividad y ta haci e pash-
entnan mas manehabel den bida diario. Den algun caso, uzo
di cannabis medicinal a permiti famianan reduci e dosis di
sedantenan pisa, mehorando e calidad di bida di e pashent.
E debate cientifico y etico
A pesar di storianan optimista, expertonan ta subraya cu
e ciencia ta den su infancia ainda. Ensayonan clinico ta
poco, e gruponan di estudio ta chikito, y resultadonan no
ta consistente. Algun pashent ta experencia biramento di
LOCAL 3
cabes, soño, of un empeoramento di confusion—efectonan
secundario cu por ta peligroso pa personanan grandi fragil.
Eticamente, e uzo di cannabis medicinal den cuido di
demencia ta lanta pregunta. Hopi pashent no por duna
consentimento informa, pues e decisionnan ta cay riba
miembronan di famia y dokternan. Reguladonan ta keda
cauteloso, cu programanan di cannabis medicinal cu ta varia
hopi di pais pa pais y di estado pa estado. Na algun luga,
Alzheimer ta un condicion reconoci pa receta cannabis; na
otronan, e ta keda restringi.
E cuadro mas amplio: Calidad di bida
Pa cuidadonan, e debate hopi biaha ta reduci na calidad di
bida. Si cannabis ta yuda reduci agresividad of mehora soño
sin uzo di sedantenan pisa, e por trece paz no solamente pa
e pashent, sino tambe p’esnan cu ta cuid’e. Toch, expertonan
ta di acuerdo cu cannabis nunca mester remplasa trata-
mento estableci, sino mas bien wordo explora cu cautela
como un opcion complementario bou di supervision medico.
Mirando padilanti
Futuro por trece mas contesta mientras investigacion clinico
ta expande. Cientificonan ta explorando si cannabinoidenan
por hunga un rol den retrasa e progresion di e malesa, y
no djis alivia sintoma. Te e tempo ey, e uzo cauteloso pero
creciente di cannabis medicinal den cuido di demencia ta
subraya e necesidad urgente pa innovacion den e manera cu
sociedad ta acerca enbehecimento y salud di celebro.
P’awo, cannabis medicinal ta ofrece speransa—pero tambe
un recordatorio cu trata Alzheimer ta mas cu ciencia. E ta
trata di compasion, dignidad, y busca maneranan pa trece
consuelo na algun di esnan mas vulnerabel den nos sociedad.