Page 67 - MIN VOS 9 APRIL 2016

Hospital no a gusta cu a bay graba e supuesto victima “klinisch
dood” cu keto bay tabata reacciona

Publication: Friday, 8 April 2016. Categoria: General
Contrario na deseo di Hospital… ta famianan mes kier pa video y potretnan a circula!

ORANJESTAD (AAN): Ta for di algun siman caba cu Dr.
Horacio E. Oduber Hospitaal a inicia un investigacion interno, den un esfuerso pa compila tur informacion relevante
rond di e caso particular den cual un mama a fayece despues di parto, mescos un di su yiunan morocho.
Aunke cu ta e siman aki e caso a bira popular riba red social, ya for di algun dia caba Dr. Horacio E. Oduber
Hospitaal mes a start cu un investigacion. Esaki pa verifica cu tur procedura a cana segun normanan fiha.

Dr. Horacio E. Oduber Hospitaal ta sigura cu lo haci uzo di tur forma y instrumentonan pa yega na un conclusion
riba kico a sosode cu e mama y e baby den e caso specifico aki. Ta pidi poco pasenshi di comunidad, pa por duna e
expertonan oportunidad pa haci un investigacion riguroso y debido.

Hospital ta purba di desvia atencion, bisando cu nan ta lamenta cu potret y video di un pashent interna den
Hospital, practicamente for di tino y den coma, ta circula riba red social, bla bla bla. Siendo cu ta famianan mes ta
insisti pa e video y potretnan circula! Famia kier pa pueblo mira kico ta pasando, pues Hospital no por bin purba di
tira smokescreen atrobe.

Hospital ta furioso cu hende a drenta den e camber como amigo pa graba of saca potret di un persona den un
estado asina y comparti’e abiertamente asina riba internet.

Pero famia ta full OK cu e video. Pakico Hospital tin di preocupa? Si acaso e video no ta existi, pueblo lo no a kere
e storia cu mediconan ta bisa cu e ta ‘clinicamente morto”, siendo e video ta demostra net lo contrario.

Na final, Dr. Horacio E. Oduber Hospitaal ta conta cu riba mil empleado bon prepara, capacita y cu experencia pa
atende pashentnan interna pa tratamento medico. Ta expresa palabranan di profundo condolencia y forsa na
famianan y conoci nan di e fayecidonan.

http://www.diario.aw/2016/04/hospital-no-a-gusta-cu-a-bay-graba-e-supuesto-victima-klinisch-dood-cu-keto-bay-tabata-reacciona/