Page 38 - KPA

E ta sigui conta cu e landsbesluit a wordo traha riba dje. Lo por informa pueblo cu e sticker
cu lo bay conta pa e prome dos kwartaalnan di 2018 ta color shinishi y esun cu ta conta pa
ora cu un cliente a haci pago pa full 2018 di impuesto di vehiculo di motor, ta color fucsia.

Lo bay prepara full e proceso. A cuminsa caba cu e preparacion di e proceso y ta premira pa
keda cla cu esaki pa e di dos of di tres siman di november, pa asina duna e clientenan
suficiente espacio pa bin departamento di Impuesto y cuminsa paga nan Impuesto di
vehiculo di motor. E brommernan si ta haya number nobo y esaki ta color blanco cu number
oranje.

Gomez-Pieters a splica cu si mira bon e cifranan, compara cu e presupuesto, ta basta
satisfecho. Por mira cu e clientenan a cumpli cu e terminonan di pago. A manda diferente
carta durante e temporada cu a pasa, caminda cu a manda un carta di notificacion pa
clientenan cu no a cumpli cu e pago di e prome dos kwartaalnan. Na Juni, a manda un di
dos carta di notificacion y ta mira cu e clientenan a duna nan response na esaki. Loke cu a
ripara tambe cu tin hopi cliente a entrega un carta caminda cu nan ta bisa cu nan no ta di
acuerdo cu e cobranza di añanan anterior, pasobra nan no a entrega nan plachi di number,
of a perde nan plachi di number of a wordo horta. Ta pone enfasis riba e aspecto aki,
caminda cu tur aña ta menciona den comunicadonan di prensa cu clientenan cu mester
entrega nan plachi di number, si e auto of number no ta mas den servicio. Si esaki no
sosode, e por trece consecuencianan indesea pa e cliente caminda cu si e bay paga na
Impuesto, no por procesa su pago pasobra e tin debe habri di añanan anterior