Page 49 - kpa juli 3 2015

Cuerpo Policial di Aruba ta haya hopi yamada di prensa
Hulandes

Publication: Friday, 3 July 2015. Categoria: Policial

ORANJESTAD (AAN): Nos a combersa cu Lito Lacle, vocero di Cuerpo Policial di Aruba,
encuanto e rumornan cu tabata core rond cu tin un Polis Arubiano envolvi den e caso fatal di
Mitch Henriquez den fin di siman na Den Haag.
Lacle a confirma cu nan a bin ta hayando hopi yamada for di prensa Hulandes despues di e
sucedido tragico na Hulanda unda cu un Arubiano a perde su bida na man di un grupo di
funcionarionan policial. Lacle a bisa cu principalmente prensa Hulandes tabata kier sa cual tabata
e medidanan cu Cuerpo Policial a tuma pa protege famia di nan colega Hulandes.
Nan a mustra prensa cu proteccion di bida di ciudadanonan ta nan trabou y ta cumpli cune. Pero
tambe prensa Hulandes tabata kier sa informacion riba bida di e funcionarionan policial tempo cu
e tabata traha na Aruba.
Esaki ta informacion cu sigur nan no por duna como Cuerpo Policial. Unico cos cu Lacle por
bisa cu e conoce e Polis Arubiano aki bon y te asina leu cu e sa, asuntonan personal a pone cu el
a bay biba na Hulanda. “Mi ta kere ta keda na e Polis mes splica pakico el a dicidi di bay biba na
Hulanda.”
E ta haya hopi lamentable tur e storianan cu ta wordo conta rond di nan colega Arubiano bibando
na Hulanda. Loke a sosode mes riba e dia en cuestion, ta investigacion mester determina esaki y
si e tabatin algo di haber of no. E por a compronde si cu tabatin contacto cu Cuerpo Policial di
Aruba riba e tema aki. E no sa kende tin contacto cu e colega y unico cos cu e por bisa ta cu
medidanan di preocupacion a wordo tuma.
Lacle conoce tanto e Polis como e fayecido pa cual mes e ta apela pa un investigacion imparcial
tuma luga.