Page 25 - Awe Mainta

AWEMainta Diasabra, 26 September 2015 25

Awe diasabra 26 di september,

Oranjestad Business
Improvement District
y comerciantenan
cla p’e tremendo
Shopping Bazaar

AWE DIASABRA, comercio di Caya Grandi,

conhuntamente cu Oranjestad Business Improvement
District (OBID), ta organisa un tremendo Shopping
Bazaar. E ta priminti di bira algo grandi, cu promocionnan
atractivo, mientras cu clientenan por haci nan compra
den un ambiente hopi agradabel. Stanley de Marchena,
representando OBID, a splica cu e entusiasmo a keda
despues di e prome bazaar organisa e augustus ultimo,
tanto serca e comerciantenan como tambe e clientenan.
A scoge pa tene esaki riba e ultimo diasabra di luna, cual
ta 26 di september.

Den cuadro di esaki Stanley de Marchena a splica cu
e ta un bon ocasion pa pueblo haci nan compra awe
diasabra, haciendo uzo di e ofertanan special cu tin for
di cuminsamento te cu final di centro di Oranjesad.
“Tin masha promocion ta wordo haci dor di diferente
comerciante. Nos kier p’e pueblo haci uzo di loke caya
grandi ta bay ofrece.” E shopping bazaar di Caya Grandi
ta bay wordo combina cu diferente actividad cu ta trece
ambiente, manera weganan di mucha den forma di Dino
Jump.

“Cu esaki nos kier demostra cu Caya Grandi ta un lugar
pa shopping y entretenimento, “ de Marchena a duna
di conoce. Y a agrega cu e tiendanan ta habri normal
mainta y ta keda habri te den oranan di anochi. OBID
ta masha contento cu e cooperacion cu nan a ricibi di
comerciantenan di centro di ciudad y ta hustamente e
exito cu tabatin cu e bazaar di “Back to School” cu nan a
pidi pa un evento similar. Stanley de Marchena a sigura
cu e tipo di eventonan aki ta sigui tuma lugar den centro
di ciudad, sigur di awor pa fin di aña.

E proximo lo ta den e temporada di Halloween unda cu
lo tin competencia di bou di muchanan mientras cu e
grandinan lo bay ta haciendo nan compras.