Page 104 - ttc nov 4,2015

Rekisitonan pa estadia pa turistanan Venezolano lo bay bira
mas estricto

Publication: Wednesday, 4 November 2015. Categoria: General

ORANJESTAD(AAN): Minister Benny Sevinger a bay Parlamento pa atende cu algun
preocupacion cu tin relaciona cu e fluho di turista Venezolano. El a duna un splicacion amplio
durante e reunion cu e comisionnan fiho di Husticia y Turismo, caminda cu el a relata riba e
situacion ampliamente. El a trece diferente punto dilanti.

Uno ta cu Venezuela ta di dos mercado turistico mas grandi. Durante añanan tin un cierto
cantidad di turista cu ta bin for di Venezuela pa hopi decada, cu ta trece entrada pa nos
economia. Den e caso ey tin un aumento den e cantidad e aña aki, cu ta mas di 100 mil turista,
según cifranan di ATA cu a aumenta.

Den e 100 mil ey extra tin cu cuestiona cua di nan ta e turista cu tabata custuma cune cu ta keda
den hotel y cu ta come y bin como turista of cuanto di nan cu ta bin pa raspa carchi y cu ta keda
na cas di hende, cu ta worde busca y cu ta haci negoshi. Tambe tin un grupo tambe, door di e
problema cu no tin suficiente comestibles na Venezuela, cu ta bin pa haci negoshi. Ta bin y
cumpra productonan y ta hiba back pa bende cu ta gewoon comerciantenan nobo, mirando e
situacion di un pais den esey.

Den henter e discusion ey tin cu tuma medida, e minister a enfatisa. E punto di salida ta cu
pueblo tin un preocupacion. Pueblo ta wak, pueblo ta tende y e preocupacion ey mester purba di
trece e solucion of alivio den esey. Pa esey tabata tin varios discusion den ministerraad y e punto
di salida ta, teniendo cuenta cu tur e interesnan den e caso aki, esta interes turistico, interes di
siguridad, interes di negoshi cu ta ganando placa, teniendo tur e cuentanan ey, medidanan por
worde tuma.

Den e caso ey, un comision a worde institui y a bin cu recomendacion cu ta verscherp diferente
punto. Algun di e puntonan ta cay bao di ministerio di minister Sevinger, cu ta den e caso aki
Dimas cu tin cu verscherp diferente punto pa loke ta trata dunamento di vergunning. Algun di
nan ta cay bao di minister di labor, cu tin un verscherping tambe riba peticionnan cu ta drenta na
departamento di labor y algun di nan tin di haber cu IASA, cu ta esun cu tin cu controla pa e
hendenan of warda nos costa cu tin cu controla esnan cu a pasa nan estadia, worde manda back
nan pais.