Page 29 - AVP

Informacionnan internacional tabata basa riba potretnan di Juan Guaidó bou proteccion
di paisnan liber na Europa caminda e tabata papia di economia di un Venezuela, cu el a
laga atras.

Con Juan Guaidó ta bolbe Venezuela y kico mundo liber lo haci pa sigura cu nada lo
pasa su persona, cu a keda sin oficina ayera ora tropa di Maduro a tuma poder di e
oficinanan den Asamblea Nacional?

Ayera nochi nos mester a cera e edicion di awe. Ultimo declaracionnan di Merca y di
grupo Maduro tabata mustra cu situacion na Venezuela ta mas cu serio.

Mientras nos ta redacta e informacionnan pa Aruba, nos mester puntra nos mes con

gobierno anterior tabata capaz di destrui futuro di Aruba manera a sosode? Con un ser
humano por haci cu un pais, loke gobierno anterior a haci cu Aruba ora Citgo a bira un
trampa pa gobierno anterior haya voto?

Aruba a wordo destrui dor di Citgo, cu tabata e areglo cu a permiti un homber manera
Nicolas Maduro trece su amigonan cu mundo liber tabata busca pa hinca den prizon,
Aruba.

Bienestar di Aruba a wordo destrui mientras gobierno anterior tabata laga pueblo baila
di alegria den un falsedad historico cu a kibra economia di e pais cu ya tabata den un
desaster financiero.

Con gobernantenan cu a bay contra tur regla pa satisface Nicolas Maduro awe ta sinti
nan mes? Si tuma nota di declaracionnan di politiconan di gobierno anterior, cu tabata
partner di Nicolas Maduro, mester duda cu nan tin sentimento pa Aruba.

Ainda ta continua cu e trampa y ainda ta trata di cumpra Aruba cu e abuso mas grandi
cu e pais a yega di experencia.

No tin palabra pa describi loke a pasa cu Aruba. No tin forma pa splica kico gobernacion

anterior tabata capaz di haci ora nan a entrega futuro di Aruba na Nicolas Maduro.