Page 13 - AWEMAINTA

Diaranson, 16 Mei 2018 AWEMainta 13

Muhe a bebe y a bira Hulk riba tur hende

DIALUNA algo prome cu 8’or y mey di anochi,
presencia di polis ta wordo pidi na Pelican Pier
pa un dama turista cu tabata riba un catamaran,
kende tabata bou influencia y tabata haciendo
hopi fastioso. Polis maritimo ta bay atende cu
e dama aki, mientras tabata wardando riba un
patruya di polis.
Na yegada di e patruya, e agentenan policial ta
papia tur na bon cu e dama aki, kende no tabata
mustra mucho bon di cabes y e no kier a rasona.
E agentenan na e sitio ta dicidi di transporte pa
warda di Strandpolitie. Pero pa pone den auto
tambe tabata un problema, ya cu mester a pone
na boei, man y pia, pa e no sigui haci desordo.
Na caminda pa warda di Strandpolitie, e dama
ta bira mas razo ainda y agresivo riba dje. El a
cuminsa comete destruccion na e auto di polis,
ora cu nan tabata na altura di Riu Antilla. E
agentenan a dicidi di no sigui cu e dama aki
mas den e patruya, pero nan a opta pa pidi pa
presencia di transportwagen di polis cu ta apto
pa e tipo di transportenan aki.
Hopi lihe e transportwagen ta yega na e sitio
y ta tuma e turista aki over, na man y pia e
polisnan a boei e dama pa por a hink’e den e
transportwagen. Asina mes na caminda pa
warda di Shaba, el a logra destrui un glas tambe
di e transportwagen, e glas di patras na banda
drechi.
Ora cu a yega warda di polis na Shaba, esaki
tabata un otro problema. E agentenan policial
mester a carga e muhe pa hibe den Warda di
polis. Mientras nan tabata cargando e, e tabata
yora y bisa cu “Let me go, I won’t do it again”,
pero ya tabata hopi laat pasobra el a destrui
propiedad di Cuerpo Policial y sigur mester
wordo poni responsabel pa e destruccion cu el a
comete na e dos vehiculonan policial.