Page 9 - AWEMAINTA

Diaranson, 16 Mei 2018 AWEMainta 9

Prinses Laurentien van Oranje a reuni cu Banco Central di

Aruba pa duna inicio n’e proyecto di Conseho di Mucha

BANCO Central di Aruba (BCA) a haya bishita pa su
Alteza Prinses Laurentien van Oranje, hunto cu sra. Alice
van Romondt, representante di Conseho di Mucha na Aruba
y miembro di e Board of Trustees di e Fundacion Missing
Chapter.
Sra. Jane Semeleer, Presidente di BCA, a ricibi Prinses
Laurentien y sra. van Romondt.
Durante e reunion, Prinses Laurentien a conta riba su pasion,
cual ta su trabou cu mucha via di su fundacion Missing
Chapter.

Pakiko no scucha e opinion di muchanan tocante asuntonan
cu tambe por afecta nan futuro? Danki na un Conseho di
Mucha, muchanan lo por yuda institucion y organisacionnan
pensa structuralmente riba cuestionnan di strategia y social.
Cu Conseho di Mucha, nos tur lo beneficia. Muchanan lo tin
e oportunidad di pensa riba e dilemanan real y cu ta concerni
e mundo actual, esnan encarga cu tuma decisionnan lo bay
tin perspectivanan fresco y e maestronan lo ta inspira dor di
e capacidad intelectual y creativo di nan studiantenan.

Sra. Jane Semeleer a aplaudi e iniciativa di cuminsa cu un
Conseho di Mucha na BCA. El a enfatisa e importancia di
involucra y aborda e generacion nobo di mucha y di e jongnan
pa traha pa un comunidad inclusivo y sostenibel.
Durante e reunion, Prinses Laurentien a ricibi un presentacion
riba e crecemento inclusivo, un estudio cu a completa
recientemente na BCA.
E presentacion a focus riba e importancia di igualdad,
inclusion financiero y e inovacion pa futuro desaroyo di
Aruba, poniendo enfasis riba e importancia di lidera for di
futuro, enbes di extende e pasado.

E reunion entre Prinses Laurentien y BCA a conclui cu e
identificacion di y discusion riba oportunidadnan estrategico
pa un cooperacion nacional como tambe institucional p’asina
fomenta e inclusion na Aruba, particularmente enfoca riba
nos muchanan.