Page 6 - AWEMAINTA

6 AWEMainta Diaranson, 16 Mei 2018

Mas cu 10 atraco den un corto tempo

Atraco arma riba comerciante y su famia

DIALUNA anochi a tuma lugar un atraco arma
riba un comerciante Cubano di 42 aña kende
ta biba na Noord. E hecho a causa además di
consternación, a laga hopi hende, no solamente e
famia, den un susto grandi, cu miedo cu nan por
ta e siguiente victima na cualkier momento.
Na e sitio por a mira ainda tres saco di cuminda
poni pafo, aparentemente e victima lo a caba bin
cu cuminda cas, na momento cu el a wordo atraca
pa dos persona, cara tapa cu muts preto y ambos
tabata bisti full na preto. Segun informacion cu el
a duna, e dos atracadonan tabata mustra jong y
un di nan tabata tin barba.
Niun momento e comerciante a resisti y a haci
loke nan tabata bis’e, mirando cu tabata tin
mucha hungando pafo. Asina mes e atracadonan
a dal’e varios biaha riba su cabes, cu consecuencia
cu el a ricibi un kap hundo riba su cabes.
E dos atracadornan tabata tin un arma di candela
den nan poder y nan tabata papia bon spaño.
E delincuentenan a logra bay cu un holoshi
caro, cartera, yabinan importante y un cantidad
no conoci di placa. Despues di a pasa man pa
e materialnan ya menciona, e atracadonan a
bandona e sitio, lagando e comerciante herida, y
a bay direccion di e mondi panort di Centro di
Bario Noord.
Personal di ambulance a trata e victima na e sitio
y despues a transporta e victima pa hospital pa
un chekeo medico mas avansa.
Presencia di slachtofferhulp, atraco team y
tambe recherche tecnico a wordo pidi na e sitio.
Parlamentario Dowers a presenta na e sitio,
aparentemente e lo ta un bon amistad di e
comerciante Cubano aki.
AWEMainta a bay tira un bista den articulonan
di archivo y mester bisa cu tin mas cu 10 atraco
caba a wordo cometi den un periodo relativamente
cortico. Den mayoria di caso a haci uzo di arma
di candela.