Page 3 - HOH

6 LOCAL AWEMainta
Palabranan ta importa:
Siñando pa papia cu amabilidad cu otronan
DEN un mundo caminda opinion ta bula mas lihe cu echonan y critica hopi biaha
ta zona mas duro cu cuido, papia cu amabilidad por sinti manera un arte perdi.
Pero amabilidad den nos palabranan no ta djis tocante ta “nechi.” E ta tocante
scoge pa eleva en bes di tene abou, pa conecta en bes di husga, pa cura en bes
di haci daño. Nos tur sa cu palabra tin peso. Un cumplimento por cambia e dia
di un hende.
Un comentario duro por keda cu un persona pa añanan. Toch hopi biaha nos
ta papia sin pensa, specialmente ora nos ta stress, rabia, of pasando door di
rednan social. Pues con nos ta cambia rumbo pa amabilidad — no solamente
den loke nos ta bisa, pero con nos ta bis’e?
E ta cuminsa cu intencion: Papia cu amabilidad no ta sosode pa accidente. E ta
un escogencia cu nos ta haci den cada combersacion. Prome cu nos papia, nos
por puntra nos mes: Esaki ta yuda? Esaki ta berdad? E ta necesario? E lo edifica
un hende? Si e contesta ta no, kisas silencio — of un palabra mas suave — ta e
miho scogencia.
Tono ta tur cos: Bo por ta bisando e cos corecto, pero si bo tono ta sarcastico of
Diasabra, 22 November 2025
despectivo, e mensahe ta perdi. Un tono amabel
ta invita apertura. E ta mustra respet. E ta laga
hende sinti cu nan ta wordo mira en bes di wordo
husga. No ta trata di dorna e berdad — ta trata di
ta honesto sin haci daño.
Paga tino na e momentonan chikito: Amabilidad
no ta djis pa discursonan grandi of reunionnan
importante. E ta biba den e bida diario: E manera
cu nos ta cuminda un hende, con nos ta responde
na un eror, e pasenshi cu nos ta mustra ora un
hende ta lucha pa splica su mes. Esakinan ta e
momentonan caminda amabilidad ta conta mas
tanto.
Amabilidad no ta debilidad: Algun hende ta
pensa cu papia cu amabilidad ta nifica cu bo ta
mucho moli of no ta para firme. Pero amabilidad
berdadero tin forsa su tras. E ta rekeri dominio
propio, consciencia, y empatia. Ainda bo por bisa
no, ainda bo por expresa desacuerdo, ainda bo
por desafia loke ta robes — sin crueldad.
Palabranan ta crea cultura.
E manera cu nos ta papia ta forma e ambiente
rond di nos — na cas, na scol, na trabou. Un
palabra amabel por calma tension, genera confi-
ansa, y cambia un combersacion for di defensivo
pa colaborativo. Ora lider-, maestro-y mayornan
modela habla amabel, e ta plama. Otronan ta sigui.
Nos ta modela pa e proximo generacion:
Muchanan ta refleha loke nan ta tende. Si nos
kier lanta muchanan compasivo cu ta comunica
cu respet, nos mester papia asina nos mes. Cada
palabra cu nos bisa ta bira parti di nan vocab-
ulario — no solamente linguisticamente, pero
emocionalmente.
Hasta online. Specialmente online. Rednan social
a hacie facil pa papia sin consecuencia — pero
tambe facil pa haci daño sin realisa. Siña papia
cu amabilidad ta nifica aplica e mesun respet cu
nos lo uza persona pa persona na nos presencia
digital. Prome cu post of comenta, puntra: Mi lo
bisa esaki den nan cara?
Pues awe, purb’e. Pausa. Hala rosea. Papia
cu amabilidad. No pasobra bo mester — pero
pasobra bo por.