Page 32 - ARUBA BANK

Minister Bermudez riba rapport di CAFT: “Mi no ta duda cu
nos lo logra pa 2017 tambe”

Tuesday, 13 June 2017 18:42
Comparti

Despues di a ricibi e rapport di e prome kwartaal di College Aruba Financieel Toezicht (Caft), Minister di
Finanza, Angel Bermudez ta sigura cu e maneho no a cambia y cu Gobierno lo logra cumpli cu e norma di
deficit di 0.5% manera stipula. “Nos ta trahando duro den e mehoracion di nos finanzas publico y pa
haci’e uno duradero.

E ta un trabou basta largo y maske cu no a yega ainda, nos ta riba e bon caminda”, e mandatario a indica
e siman aki. Na mes momento e Minister Bermudez ta splica cu mester tene cuenta cu ainda no tin cifra
pa compara y cu e patronchi di entrada ta varia. Segun e mandatario, Gobierno ta sigui alerto pa loke ta
trata presupuesto, principalmente ya cada aña e reto ta sigui bira uno mas grandi. Mientras tanto,
Minister Bermudez ta pendiente di e cifranan di luna di Mei y Juni pa asina mira e resultadonan di e dos
kwartaal cu segun e mandatario lo ta cifranan hopi mas indicativo di con e resto di aña lo cana. Pa loke ta
trata e conclusionnan di e colegio Caft, e mandatario ta admiti cu semper e colegio tabata critico sin
embargo experiencia di e ultimo añanan a indica cu tin biaha Caft ta uza argumentonan cu no ta corecto
pa funda nan conclusion, por ehempel, ora ta papia di e cantidad di personal cu segun Caft, pa e kwartaal
aki a subi barbaramente. Minister Bermudez ta sigui splica cu den e pagina 13 di e mesun rapport e
desaroyonan ta ilustra cu den e prome kwartaal di e aña aki e cantidad di empleadonan ta mas abou
compara cu e prome kwartaal di aña pasa. “Mi no ta sigur di unda e colegio ta yega na nan
conclusionnan”, asina Minister Bermudez a expresa. Finalmente Minister Bermudez a argumenta cu a
pesar di e criticanan consistente di e colegio ya caba den pasado Gobierno a demostra di a logra cumpli
cu e normanan tanto pa aña 2015, como tambe 2016.