Page 4 - MIN VOS

10 AWEMainta Diamars, 4 Juli 2017

Joselin Croes di POR:

Nos pueblo no por

biba ni come di

klinkers y asfalt

DESPUES di a bishita hopi cas den San Nicolas, Tanki Leendert y Noord,
e critica cu mas Joselin a haya di e famianan cu el a bishita ta cu e Gobierno
actual a malgasta e placa di pueblo riba asfalt y klinkers, pero cu e hende mes
no a conoce un progreso den nan bida diario. Nan ta sinti cu nan ta biba di
salario pa salario.

Con nan ta defini progreso y bienestar?
Prome cu tur cos nan ta bisa cu e costo di bida na Aruba a bira hopi caro y
cu nan salario no ta yega pa por cumpli cu nan debenan.
Di dos nan no ta sinti nan mes sigur mas riba caya of den cas. Nan ta bisa no
tin control ni riba caminda ni den barionan.
Di tres nan ta bisa cu cuminda, awa, coriente cu ta e cosnan basico cu bo
mester pa biba ta hopi caro.

Di cuater nan ta bisa cu e gastonan di bida y gastonan escolar di na
yiunan a bira hopi caro y pa esnan cu tin yiu cu a caba di gradua
nan critica ta cu nan no por haya trabou paso economia ta
stagna.

Pa esnan cu ta huur cas nan ta bisa cu nan ta frustra
cu tur luna mester paga huurnan carisimo paso no tin
tereno pa nan y no tin casnan social, segun Joselin.

Manera boso por ripara nan no ta midi nan progreso
y bienestar na cosnan di luho, edificionan bunita,
klinkers, asfalt, smart communities, etc.

Nan ta midi nan bienestar y progreso na por biba trankil,
preferibel den un cas propio, un empleo cu un salario cu ta
cubri e bestaansminimum, un bon estudio y trabou pa nan yiunan,
siguridad riba caya y den nan cas y cumindanan na prijsnan controla,
Joselin ta splica.

Proximo gobernacion, POR su prioridad ta e hende. Cada famia mester por
yega na nan propio cas, nan salario mester por cover nan gastonan basico,
educacion mester ta acesibel na tur hende, mester bin cu un economia
nobo pa crea cupo di trabounan nobo, mester bin cu reforma fiscal pa laga
e hende cu mas placa den su saco p’e por paga su gastonan, mester bin
un miho transporte publico y por ultimo mester brinda nos hobennan e
oportunidad pa ta creativo y activo despues di orario di scol cu arte, deporte,
musica y tecnologia y asina yuda e mayornan cu ta traha te cu 5’or di atardi,
Joselin ta mustra.

Una bes bo logra yuda e hende prospera bo ta yuda bo comunidad prospera,
una bes bo comunidad prospera bo pais completo ta prospera y nos ta “one
happy island” di berdad y no riba sticker so. Joselin ta convenci cu Aruba
masalmente ta bay vota p’e cambio cu Aruba tanto ta anhela dia 22 di sep-
tember, Joselin Croes ta duna di conoce.