Page 58 - KPA JUNE 9

Apelacion riba comunidad pa yuda gara antisocialnan
pedofiel rond di scol

Publication: Tuesday, 9 June 2015. Categoria: Policial
Polis ta duna tips:

ORANJESTAD (AAN): Hefe di Jeugd- en Zedenpolitie, Inspector di Polis Eric Lake den un
entrevista dialuna a haci un apelacion riba comunidad pa ta atento pa cu hendenan desconoci cu
por ta posibel antisocial cu ta frecuenta rond di scolnan e dianan aki.
Siman pasa a drenta por lo menos tres yamada di ciudadanonan pidiendo pa polis atende cu
situacionnan indeseabel rond di algun basisschool. Un caso conoci, cu a wordo publica ta e caso
di e homber cu a mustra su parti intimo na muchanan nan un basisschool na Klip/Playa. Tabatin
un otro caso tambe. Den un caso a saca potret di e homber ora e tabata core bay.
Den un caso a papia di un persona na pia y pa cu e otro a duna polis desripcion di un color di
auto. Den un caso a saca potret di e antisocial ora e ta core bay, pero e cara di e persona of
marcanan cu por identifica e persona no tabata mucha cla riba e potret.
Loke e antisocial(nan) aki ta haci ta saca nan parti intimo y invita muchanan pa bin combersa cu
nan.
E momentonan mas importante pa ta extra atento ta prome cu scol cuminsa, den pauze y ora scol
caba.
Asina cu e kehonan a drenta Jeugd- en Zedenpolitie a cuminsa un investigacion rigoroso.
Entretanto Lake a pidi den tur districto pa coleganan ta extra atento rond di e scolnan y yuda
patruya un poco extra rond di e scolnan durante di oranan di scol.
Inspector Lake a haci un apelacion riba comunidad pa si nan wak un persona desconoci rond di e
scol di nan yiu pa wak e persona bon, si ta posibel saca su potret, wak kico e persona tin bisti, y
si e ta den auto y ki marca, color y number e auto tin. Otro detayenan cu ta yuda polis
enormemente ta su color di cabey, y su color di cuero. Tur detaye di loke a pasa ta relevante y si
tin testigo ta miho ainda, Lake a splica.