Page 5 - Min On 17 SEPT,2015

High season ta den porta y gremionan kier wak ehecucion di
plannan

Publication: Thursday, 17 September 2015. Categoria: General
Na opinion di Asociacion ATIA:

ORANJESTAD (AAN): Riba iniciativa di FTA, ATIA y AHATA a cuminsa algun luna pasa cu
loke ta resultando den un serie di reunion riba e topiconan crimen y siguridad.
Dialuna a tuma luga e di tres reunion, e biaha aki cu envolvimento di Prome Minister Mike
Eman, kende a presidi e reunion, Minister di Husticia y Cuerpo Policial, y Minister di Enseñansa
y Departamento di Enseñansa.
President di Aruba Trade & Industry Association (ATIA) Michel Henriquez a splica cu esaki
tabata e di tres reunion, e biaha aki di parti di gobierno a envolve hopi mas gremio y e reunion
tabata basta largo, pero e tempo inverti tabata necesario pa comparti tur e informacion y
intercambia di idea.
Henriquez a splica cu e gremnionan a haya presentacionnan basa riba e situacion actual, con ta
para cu siguridad na Aruba y kico ta worde haci, como tambe e plannan y vision riba e tereno di
siguridad.
“Si tur cos ta bon, nos no a keda cla si. E tres greminonan cu a cuminsa esaki lo kier a wak mas
specifico kico lo worde haci den e periodo nos dilanti,” Michel Henriquez a subraya. El a agrega,
“Nos ta drentando high season y esaki ta e periodo unda cu tur actividad riba caya, riba caminda
ta bay subi tambe y nos lo kier wak toch kico ta bay ta e efecto of kico ta e plannan di gobierno
vooral pa e parti di siguridad.”