Page 7 - Min On 17 SEPT,2015

Ta haya cu tin hopi trabao cu a worde haci pero tin hopi
incertidumbre y preocupacion riba criminalidad

Publication: Thursday, 17 September 2015. Categoria: General

SIMAR durante Dialogo Social:

ORANJESTAD (AAN): Aunke cu FTA hunto cu ATA y AHATA a pidi un reunion cu
Gobierno riba e tema di criminalidad, esaki a worde amplia y mas gremio tabata presente na e
encuentro aki cu a tuma luga dialuna atardi na Dr. Edward Cheung Innovation Center.

SIMAR tabata representa door di Maroushka Cornelie, Secretario di e Organizacion Sindical di
Maestronan. Tabata importante nan presencia ya cu Minister Enseñansa tambe tabata presente pa
duna un presentacion di kico ta worde haci na schoolnan pa evita cu hobennan ta drenta
criminalidad.

E ta haya cu den e encuentro aki a keda demostra hopi incertidumbre y preocupacion, y e ta kere
cu tin hopi trabao cu a worde haci, mientras cu tin otronan cu ta pendiente pa hopi aña caba.

Apesar di e presentacionnan cu a worde haci di plannan cu tin den ehecucion, mescos cu FTA,
SIMAR tambe a pidi pa solucionnan a corto plaso pa e problema di criminalidad. El a menciona
un gedragscode cu nan a caba di finalisa y lo worde implementa dia prome di october. Esaki ta
un maneho hopi importante pa pone accento riba e actitud of comportacion cu ta spera di e
studiante, e docente, e mayornan y e directivanan di school. E ta encera e caminda pa cana ora di
conflicto, di mal contento of ora tin un keho. Actor sa kico ta spera di dje y kico mester haci.

Pa loke ta e encuentro di dialuna, SIMAR a pidi pa un otro encuentro pa scucha e resto di
presentacionnan y tambe haci e preguntanan cu a keda pendiente.

SIMAR, ta kere cu enseñansa di Aruba ta bon prepara y ekipa y loke cu falta, cu ta e
gedragscode, ta na punto di worde implementa. E lo yuda pa den futuro evita cierto problema. Pa
loke ta siguridad, e ta haya cu mester tin vigilancia rond di schoolnan y a puntra e mandatario si
ta bay tin camera rond di schoolnan y a haya un contesta positivo rond di esaki. “Esaki ta algo cu
nos no a scucha den pasado,” Cornelie a comenta.

Otro aspecto menciona, ta cu SIMAR ta kere cu e conflicto cu tin entre Gobierno y SKOA
mester worde soluciona mas pronto posibel, ya cu pa schoolnan di SKOA e ta haci un impacto
grandi, ta stroba desaroyonan y pa siguridad di e schoolnan aki e ta hunga un rol pasobra no tin
placa. E ta admiti cu el a Sali di e reunion un poco mas satisfecho pa loke ta e cifranan duna. El a
worde informa cu tin rond di 500 polis pero cu falta un poco mas pa haci e trabao debidamente,
pero toch e Minister a bisa cu esaki no mester ta algo di preocupacion. Toch SIMAR ta sinti cu
mester mira Polis mas riba caya, principalmente rond di schoolnan.

http://www.diario.aw/2015/09/ta-haya-cu-tin-hopi-trabao-cu-a-worde-haci-pero-tin-hopi-
incertidumbre-y-preocupacion-riba-criminalidad/