Page 70 - min vos - may 7, 2015

Casi 10 persona a solicita pa e puesto di director di HOH

Publication: Thursday, 7 May 2015. Categoria: General
Segun Minister Schwengle:

ORANJESTAD (AAN): E proceso pa yega na un director di Dr. Horacio Oduber Hospital ta
andando ainda. E ta un proceso basta largo, ta loke cu Minister di Salud Publico dr. Alex
Schwengle a bisa den un declaracion duna.
El a sigui splica cu algun luna atras a cuminsa cu e seleccion di e Presidente di e directiva, cu ta
director di hospital. E dos otro posicionnan ta ocupa caba y falta solamente e Presidente. Ta
busca un persona cu tin experiencia den maneho di un compania grandi, cu tin conocemento di
sector di hospital y hospitalidad, algo di e ramo di cuido, pero hopi importante ta cu e mester ta
un bon “team player”.
Otro aspecto ta cu e mester conoce e cultura di Aruba. E mandatario a wordo informa door di e
comision encarga cu e procedura di seleccion, cu tin varios candidato cu e solicita. Pa haci e
seleccion mas obhetivo posibel, Hospital a tene un destaho publico en busca di un compania cu
ta esun cu ta haci e procedura di seleccion di e director nobo di hospital.
E cantidad di solicitantenan ta menos cu 10 y e no tin conocemento si su colega Minister Arthur
Dowers a solicita pa e posicion aki. E mandatario sinembargo no por a informa ki dia por spera
un final di trabou di e compania encarga cu e procedura di e seleccion. Si e ta spera cu esaki no
tarda hopi mas.
El a enfatisa cu ta pa transparencia e Hunta di Supervision a dicidi pa hinca e seleccion di e
candidatonan den man di un compania independiente. Na final algun nomber lo wordo entrega
na Hunta di Supervision, kendenan hunto cu e mandatario lo tuma e decision riba kende ta bay
ocupa e funcion.
http://www.diario.aw/2015/05/casi-10-persona-a-solicita-pa-e-puesto-di-director-di-hoh/