Page 12 - MIN VOS

Sharline Koolman riba cifra di HIV: Na Aruba 2014 a sera cu
31 caso nobo y 2015 cu 52 caso nobo di HIV

Sunday, 20 March 2016 13:39
Tweet

Comparti

Sharline Koolman, hefe di departamento di malesanan contagioso, a comenta cu ora ta papia di Aids, bo
ta papia di HIV cu ta ora tin infeccion na comienso

y Aids ta mas bien ora bo haya cierto malesanan oportunistico cu ta afecta e persona y cu e persona ta
bira malo, y ta wordo tuma na hospital y trata pa entre otro pulmonia, of cancer di cuero, etc. Locual cu
tin mas tanto registra of loke tin ma dato riba dje ta HIV, pasobra door di e tratamentonan awendia,
mayoria di hendenan si nan wordo detecta na tempo, nan ta wordo trata door di un internista y esaki ta
bon bao di control, un persona no mester desaroya Aids awendia mas. E por biba hopi aña cu su status di
HIV. E ta manera un malesa cronico. Claro cu e tin su tratamento cu e tin cu mantene su mes si y tin cu
proteha su mes pa no pasa esaki pa un otro persona. Esey ta keda conta semper. Den e caso di HIV tabata
tin for di 2013 pa awor aki, tabata tin 17 caso nobo e aña ey. Tabata tin 16 hende homber, 1 hende muhe.
Na aña 2014, tabata tin 31 caso nobo, cu tabata 30 hende homber y 1 hende muhe y na aña 2015, no ta
sigur cu tin mas hende a bay test of en berdad tin mas caso. Pero aña pasa a haya registra te awor aki 52
caso nobo, di cual 45 tabata hende homber y 7 hende muhe. Por wak cu mayoria di e casonan cu ta haya
registra ta di hende homber. Un biaha mas esaki ta registronan cu DBZ tin. Nan por ta mas caso pasobra
sa cu te ainda tin basta hende cu sa bay haci testnan afo. E casonan ey no ta haya pa registra, y no por
guia nan tampoco. E tratamento cu eseynan no ta wordo duna na Aruba tampoco. Pa DBZ ta hopi
importante pa hendenan test mas tanto cu ta posibel pa asina nan por haya e ayudo, e guia medico cu
nan tin mester. Si bay un tiki riba e parti di edad, e categoria di edad, tur e añanan aki a keda entre 25 y
44 aña. Aña pasa, locual cu por a wak tambe, e edad di mas halto cu a registra tabata un hende homber y
e tabata tin 73 aña y esun mas hoben tabata tin 18 aña. No ta importa e edad awor aki pero tur edad ta
wordo acepta y mester uza proteccion na tur edad. Tambe ta bon pa menciona cu tabata tin 19 persona
riba 45 aña y 13 di nan ta riba 50 aña. Esey kiermen cu di e 19 personanan aki, di cada 5 persona, dos
persona ta riba 45 aña. Di e 19 personanan aki, 5 so tabata hende muhe. 14 hende homber riba 45 aña a
haya nan carchi nobo di HIV aña pasa. Berdad ta cu tin basta persona cu ta haci uzo di e sistema
boluntario y anonimo pa bin haci nan test na DBZ. E testnan ey a ripara cu mas tanto e Hulandesnan
Europeo ta haci uzo di dje. Berdad ta cu den e casonan ey, casi no ta haya HIV positivo, pero si ta haya e
otro malesanan transmiti sexualmente manera Gonorrea, Chlamydia of Herpes. Eseynan ta haya mas
tanto. Pero locual cu kier stimula ta cu tur persona local, pa haci uzo di e sistema aki. E Hulandesnan
Europeo conoce e sistema aki na Hulanda y nan ta presenta na DBZ y un ta bisa otro ta presenta pa haci
testnan anonimo y despues ta conseha nan con pa deal cu esaki. Ta pidi por fabor na esnan cu ta interesa
y kier haci nan test, por pasa na DBZ libremente. Ora cu ta bin DBZ, ningun hende no lo sa pakico ta
drenta e oficina. DBZ ta encarga cu tur malesa contagioso na Aruba, pero tambe duna vacuna, tin e parti
di foodhandlers. Ora cu drenta ningun hende no mester sa pakico bo ta bin. Ta e enfermeronan cu ta cu e
pashent so ta na altura kico e pashent a bin haci. E ta basta anonimo y ta stimula pa haci e testnan aki
mas regular, Koolman a splica.