Page 9 - MIN VOS

E internista por scoge ki tratamento e pashent tin mester pa
trata HIV

Sunday, 20 March 2016 18:51
Comparti

Tratamento di HIV antes, tabata mas complica, den e sentido cu antes mester a bebe hopi mas remedi pa
dia. Una bes cu bo wordo diagnostica, den caso di HIV, bo ta wordo trata door di un internista. E
internista ta check varios test den Sanger y a base di esey e ta dicidi cual di e tratamentonan e ta bay kies.

Tambe e mester wak si e persona, si e por cuminsa cu e tratamento, cu ta pildo. E ta dicidi si bo ta haya di
un pildo, cu ta consisti di dos remedi den dje. Tin biaha un pildo ta un remedi su so cu ta wordo yama
como anti viral. Nan ta bebe tur dia. Ta mescos cu bo tin sucu of presion cu bo tin cu bebe nan tur dia pa
tene nan bao di control. Esaki ta mesun cos. E remedinan aki ta wordo controla e ora ey cada tanto
tempo, caminda cu tin cu haci testnan di sanger atrobe, pa wak si e tratamento tin e virus bao di control
of si no a crea resistencia. E internista ta haci e tipo di testnan ey tambe. Nan ta bay Hulanda pa wak si e
mester cambia e remedi si of no. No ta simplemente pa duna e persona un tratamento y ta keda cun’e pa
resto di su bida. Tin controlnan cu mester sosode cada tanto tempo y tur esey ta den man di e internista.
Na Hulanda por ehempel tin dokter di cas cu ta haci esaki, esta e controlnan, pero na Aruba tin’e cu ta
internistanan ta control’e y te ainda no e dokter di cas. E tratamento ta exigi cierto controlnan y tambe
mester tin conocemento di e tratamento specifico aki pasobra si un pashent no ta bay bon cu un remedi,
e ta keda uz’e, e por bira resistente na dje. Esey ta nifica cu si e ta resistente y si e pase pa otro persona, e
persona aki wordo infecta, tambe ta wordo infecta cu e tipo di resistencia. Pa e motibo ey ta hopi
importante pa hasta ora un persona ta bon bao di tratamento cu casi den e sanger bo no ta haya e virus, e
mester keda uza su tratamento, mester keda uza su proteccion ora cu e tin relacion sexual cu otro
persona, Koolman a splica. E ta sigui comenta cu den caso ora cu tin Chlamydia of Gonorrea, ta un otro
tipo di tratamento. Esey den tratamento di un siman, e dokter ta duna y e ta ripiti e test atrobe y tambe
wak si tin e sintomanan ainda. Pero e Chlamydia, Gonorrea, etc., ta malesanan cu pa un of dos siman, a
cura di dje y no tin otro diagnosticonan. Bo no ta keda cu ningun resto di dje. HIV, una bes bo hay’e, bo
ta keda cun’e. Syphilis tambe ta wordo trata, pero e ta wordo trata cu Penicilline. Penicilline ta bin den
forma di hangua cu ta un poco dolor. Penicilline ta un tratamento mas largo y por dura varios luna,
depende cuanto di e virus tin den bo sanger y a base di esey e dokter ta bay duna tratamento. Tambe e tin
cu check cada tanto tempo si e ta bao di control si of no. Syphilis si ta laga un marca den bo sanger.
Semper bo check bo sanger pa Syphilis, lo bo wak’e bek. Den caso di Chlamydia y Gonorrea, ta testnan cu
ta wordo haci den urina y e testnan ey ta duna un resultado positivo of negativo y a base di esey bo ta
wordo trata.

http://www.24ora.com/local-mainmenu-5/106640-e-internista-por-scoge-ki-tratamento-e-pashent-tin-
mester-pa-trata-hiv