Page 41 - HOSPITAAL

Hospital cu introduccion di intervencion

di cardiologia

Posted on 04/16/2018 3:30 pm AST | Updated on 04/16/2018 3:32 pm AST

ORANJESTAD - Despues di varios aña trahando riba e proyecto aki, Dr. Horacio E.
Oduber Hospital awor por opera pashentnan cu ta sufri di obstruccion of ceramento di
ader. Hopi pashent na Aruba cu mester opera curason ta haci esaki via e proceso conoci
como PCI esta “Percutaneous Cornary Intervention”; un cirugia cu ta haci uzo di catheter.

Dr. Casper Laclé, cardiologo local ta splica cu awor pashentnan cu ta sufri di curason por
ricibi tratamento den e compleho specialmente pa intervencion di cardiologia. E dokter
despues di a mira con e adernan ta cera, por habri nan via un PCI. Ta haci e procedura di
catheterisacion via brasa of arteria na pia, unda ta pasa un catheter chikito na e curason
via e adernan. Asina via e catheter ta pasa un waya y un ‘balon’ of un ‘stent’ riba dje,
depende e necesidad. E stent ta un tubo cu ta wordo poni den e ader pa asina por habri e
ader di curason y alivia y normalisa e fluho di sanger.

E catheterisacion riba e prome pashentnan cu a pasa den e compleho aki a bay bon. Dr.
Laclé a duna di conoce cu e prome pashent a sufri un ataca di curason y e tabata interna
den hospital caba. “El a bay hopi bon y e ta contento”, asina e specialista a duna di
conoce. E servicio aki ta nifica cu no mester manda pashentnan cu drenta Hospital cu un
ataca di curason den exterior mas cu Air Ambulance. Aki na Aruba mes lo atende nan
asina cu nan drenta Hospital despues di sufri un ataca di curason.