Page 22 - AM250116
P. 22
22 COMUNIDAD AWEMainta Diahuebs, 16 Januari 2025
Carnaval safe pa tur mucha y hoben
RECIENTEMENTE a tuma luga e lansamento
di e di 3 edicion di e campaña di conscientisacion
pa mayor y educador titula “Carnaval Safe pa tur
Mucha y Hoben”. E campaña aki ta organisa door
di e Comision Vision Pedagogico, cu ta consisti di 5
organisacion; Tienda di Educacion, Stichting Wit Gele
Kruis, Departamento di Asunto Social, Fundacion pa
Nos Muchanan y Fundacion Respeta Mi den colabo-
racion cu Universidad di Aruba su departamento di
Social Work & Development.
E campaña tin como meta pa presenta y trece consci-
entisacion riba 7 punto pa mayor (nan) tocante con pa
tene mucha(nan) safe durante Carnaval como tambe
7 punto pa mayor(nan) con pa tene hoben(nan) safe
durante Carnaval.
E campaña aki tin 4 diferente area di concentracion cu
ta; trece conscientisacion riba plataformanan social,
workshops p’e sector publico y priva, un jingle/video
cu un mensahe directo pa mayornan como tambe
e presencia di e comision na varios eventonan di
carnaval p’asina reparti e flyer cu e 14 diferente
puntonan como tambe pa brinda conseho y sosten
na tur presente. Cada area tin nan propio actividad
nan p’asina yega n’e meta di conscientisa mayor y
dunadonan di cuido di e importancia di nos mucha y
hobennan safety durante periodo di Carnaval.
E campaña di Carnaval 71 aki ta conta cu e sosten
financiero di WEB Aruba N.V. como tambe CEDE
Aruba cu a yuda cubri e gastonan p’asina haci esaki
posibel. Un danki special na nan como tambe tur
otro organisacion y departamento presente cu ta
sostene e campaña di conscientisacion aki pa duna
nos mucha y hobennan e oportunidad pa disfruta di
Carnaval 71 na un manera safe. Nos ta reconoce cu
e rol di mayor ta sumamente importante y p’esey kier
sostene mayornan den nan tarea.
Por ultimo un danki special na SMAC cu tambe a duna
su sosten pa nos por ta presente na varios eventonan
di Carnaval p’asina por hiba e mensahe na nos comu-
nidad. E team completo kier a encurasha tur mayor y
educador pa participa y apoya e campaña di consci-
entisacion aki p’asina hunto nos por tene nos mucha
y hobennan safe durante Carnaval 71.
Ban hunto contribui na un Carnaval safe pa tur nos
mucha y hobennan aki na Aruba.
