Page 87 - MIN JUS

Husticia a detene Consehero di Minister Paul Croes

Monday, 10 July 2017 21:57
1

Comparti

Awe dialuna mainta, den cuadro di e investigacion IBIS contra Minister Paul Croes, Ministerio Publico a
confirma cu a detene E. Giovanni Capriles di 63 aña di edad, biba na Rontgenstraat # 10. E ta un di e
Conseheronan di Minister Paul Croes, encarga cu su Relacionnan Publico y alabes ta Presidente di e
Fundacion di campaña di e mandatario. Husticia ta acus'e di labamento di placa y complicidad di
soborno. Despues di a interog'e, Polis a dicidi di encarcel'e pendiente e investigacion andando.

Mester bisa cu Husticia ta investigando specificamente tambe e fundacion di campaña di e Minister, esta
Stichting Leadership and Excellence situa na Palm Beach # 51 lokaal 7 na Noord. Desde 18 di december
2014, Giovanni Capriles ta encabesa e fundacion.

Manera ta conoci, dia 28 di maart ultimo, Husticia a bishita un total di 13 diferente adres, incluyendo
Bestuurskantoor, relaciona cu un investigacion cu a haya e nomber di Ibis. A detene algun hende den e
caso aki, den cual Ministerio Publico ta acusa e mandatario personalmente di a tuma regalonan,
promesanan y/of servicionan relaciona cu "ontheffing" di e "arbeidsmarkttoets" dor di cual stranheronan
a haya oportunidad pa haya permiso di trabou. Concretamente e acusacion contra Minister Paul Croes
ta: "Ambtsmisbruik" y duna permisonan cu no tabata mag di traha na Aruba a base di nan "verblijfstitel",
oportunidad pa toch traha na Aruba. Tambe ta acus'e di labamento di placa di sobornonan ricibi. E
sospecho di "ambtelijke corruptie" ta consisti di pidi/tuma soborno a cambio di "ontheffing van het
arbeidsmarkttoets". Despues di e "huiszoeking" na su cas, a acus'e tambe di "mensensmokkel"
argumentando cu e tabatin un empleada illegal trahando den su cas.

Den e proceso a investiga y detene Harold Mansell, Juancho Filiciana y despues tres persona mas, di cual
un homber di fam Schwengle. Algun di e sospechosonan a recobra nan libertad mientras cu tin encarcela
na KIA ainda pendiente e caso penal den nan contra.