Page 20 - KPA MRT 1,2016

Polis tabata tey mesora Muher a bin razo pa mata ex homber
cu sker na Hilton Hotel

Monday, 29 February 2016 18:46
Tweet
Comparti

Un muher mainta trempan tabata masha rabia y tabata insulta tur hende den e parkinglot di Hilton
Hotel.

Tabata mainta den careda di 7or cu Polis di Noord a wordo manda cu urgencia den direccion di Hilton pa
un pelea. Den algun minuut e unidad di Noord tabata na e sitio. Eynan a haya seguridad cu un muher
wanta. E tabata arma cu un sker masha skerpi mes y tabata grita cu lo mata e homber. E homber ta un
trahador di Hilton Hotel. E muher parce a traha eynan tambe den pasado. Polis a trata di calma e muher
pero tabata dificil. Pa tur seguridad a pone boei na su man tras di lomba. Polis a bise cu e mester
trankiliza su mes. Ni maske Polis a splike e no kier a tende. A hinke den auto di Polis pendiente e
dogcatcher. No ta prome biaha e ta bin pa regla cuenta. Asina mes el a keda insisti y tabata grita cu e
manda e homber graf. E muher ta rabia pasobra no tin husticia. E kiermen cu e homber trahador na
Hilton mester ta sera. Nan dos lo tin un yiu cu otro. E relacion a termina entre e pareha aki te cu e muher
tin otro homber den su bida. Parce cu entre e trahador na Hilton cu e homber nobo a surgi un problema
recien cu a termina na agresion. E otro homber a keda malamente herida y mester a wordo atendi
medicamente. Parce te hasta el a wordo interna mirando e golpinan cu el a haya. Esaki ta loke e muher ta
considera un abuso y pesey a bay cu sker den man pa mata su ex. E ta rabia pasobra aunke a entrega
keho te cu awe e homber cu a comete e agresion ta cana liber. Ora Polis tabata trata di papia cune, ainda
e tabata expresa di lo mata e homber. Ademas di menaza el a causa daño na auto di e homber tambe. El a
corta un tire di e auto y destrui porta banda di chauffeur. Esnan cu tabata baha warda a splica na Hilton
tabata contento cu henter nan warda di marduga a bay asina bon. Diripente bayendo auto a topa cu un
situacion caminda cu nan a wordo stroba pa bay cas pasobra mester a drenta den accion ora a topa cu e
muher rabia ta busca manera di mata e trahador di e hotel. Polis lo sigui cu e investigacion despues cu
cos a calma y a detene e muher y confisca e arma. Turistanan for di balcon tabata sigui tur cos di cerca
con e muher tabata purba mata e homber y e forma cu seguridad a bay den accion.