Page 18 - MIN JUS

ORANJESTAD (AAN) — E homber L.A. di Brazil biba na Aruba a bisa Hues cu e compania cu
a wordo horta a ofrece pa cumpra e caha for di esnan cu lo a horta y e compania ta cumpra
nan bek for di dje. Ni Fiscal, ni Hues no a kere e storia aki.

E acusacionnan cu Fiscal a presenta contra L.A. ta cu na Februari 2017 el a haci su mes
culpable di incubrimento di cahanan di Vodka. Tambe Fiscal a acusa L.A. cu na 2014, el a
horta for di un cas.

Den sala di Corte tabata presente doño di e cas, kende a haci demanda di daño.

BENDE COSNAN HORTA

Hues a remarca cu investigacion di Recherche ta mustra cu L.A. a busca pa haya sa
kendenan a horta e cahanan di Vodka for di e compania y a cumpra nan pa despues bolbe
bende nan cu e compania. Segun L.A., esaki tabata e plan cu e compania mes a traha
cun’e. Hues a mustra cu L.A. a cumpra cada caha pa 150 florin y kier a bende cada un caha
pa 375 florin cu e compania. Hues a puntra L.A. si e tabata sa cu e cahanan tabata horta.
Segun L.A. e tabata sa cu e cahanan tabata horta. El a bisa cu nan a horta 22 caha y cu e
compania a ofrece 2200 florin pa e cahanan. Hues a bisa cu for di e declaracion haci den
procesverbaal ta mustra cu L.A. a cumpra y bolbe bende.

HORTA FOR DI CAS

Pa loke ta e caso di ladronicia for di cas, Hues a mustra cu Polis a haya su fingerprint na e
glas di cushina. L.A. a bisa Polis cu e no sa di nada pero den Corte el a bisa cu e tabata
hunto cu un homber y e homber a bis’e pa nan bay na e cas pasobra ta cas di su amiga.
L.A. a bisa cu e kier paga e daño cu el a causa. El a bisa cu e homber a keda cu tur e
articulonan horta.

Fiscal a bisa cu L.A. a bisa cu tabatin condena di 3 mil florin y cantidad di ora di trabou. L.A.
a bisa cu door cu e ta diabetico e no por traha den solo y tur biaha nan a mand’e traha den
solo. E tabatin su insulina den man y a bisa Hues cu e ta cana cun’e pasobra e sa bira malo.

Doño di e cas a presenta cu algun recibo pa demanda daño di loke a horta.

EXIGENCIA DI FISCAL

Fiscal ta haya legalmente proba incubrimento di e cahanan di Vodca. E ta haya cu L.A. a
gana placa cu e cahanan cu ta procedente di ladronicia. E otro caso di ladronicia di cas,
Fiscal a mustra cu ta awor L.A. a admiti. Na opinion di Fiscal, ta bisto cu L.A. kier a gana
placa cu e boternan di Vodka horta.