Page 19 - MIN JUS

Fiscal a bisa Hues cu e caso di ladronicia for di cas ta hopi mas serio. Hende ta sinti nan
mes den inseguridad. Fiscal ta haya cu no tin sentido pa duna castigo di prison teniendo na
cuenta cu e caso di ladronicia for di cas ta bieu. El a pensa den trabou pa comunidad. Fiscal
a bisa cu e ta tene cuenta cu L.A. su salud esta diabetico. Fiscal a exigi 200 ora di trabou pa
comunidad of 120 dia sera. Fiscal ta spera cu L.A. ta para responsabel pa su actonan. El a
bisa cu den Tomzitting a demanda 3 mil florin. El a pidi Hues pa confirma demanda di e
doño.

ABOGADO

Mr. Bryson ta haya cu Hues mester tene cuenta cu e salud di L.A. El a mustra cu mester
tene cuenta cu L.A. ta un diabetico y 200 ora di trabou no ta realisabel. Esaki no tin sentido
y ta causa cu L.A. lo mester bay sera. E abogado ta kere mas den 100 ora di trabou, cu lo
ta mas na su lugar.

Mr. Bryson a cuestiona e hecho cu na Tomzitting a exigi 3 mil florin pero segun recibonan di
daño ta algo mas di 1600 florin. E ta haya 3 mil florin ta mucho halto. L.A. mes a lanta para
y pidi e dama disculpa y a bisa cu e lo paga.

SENTENCIA

Hues a sera tratamento di e caso y a dicta sentencia di biaha. E ta haya legalmente proba
tur dos acusacion. Hues a bisa cu e ta tene cuenta cu e salud di L.A. y cu L.A. ta trahando.
E ta haya cu no por duna hopi ora di trabou. Hues a condena L.A. na 180 ora di trabou di
cual 80 ora ta condicional. Descontando tur e oranan cu el a traha caba, Hues ta haya cu
ainda L.A. lo mester traha 60 ora di trabou den un periodo di 1 aña y 2 aña di prueba. Pa
loke ta demanda di daño, Hues a bisa cu e ta tene cuenta cu e biehez di articulonan y ta
aproba 1500 florin.