Page 18 - HOH

Tin hende ta bisa cu na Aruba ta tarda hopi pa haya tratamento y pa manda afo. E por

tarda lunanan largo. AZV tin un proceso pa loke ta cuido medico den exterior. Semper ta

asina cu un specialista ta haci e prome peticion cerca AZV y tur siman tin un comision

medico independiente cu ta evalua e casonan.

Banda di esey, segun vocero di AZV, Solange Tchong, tin tambe loke ta yama e telefon

on call, un liña special pa emergencia, cu hopi biaha ta pa casonan di accidente of ora tin

algo grave cu a sosode na Aruba y e cuido mester bay afo, Air Ambulance por yega

Aruba pa asina hiba e pashent afo.

Tin cu wak hopi bon di cua tempo di espera ta papiando. Si ta papiando di e tempo di

espera aki na Aruba, esey practicamente por bisa no ta hopi, pasobra AZV tin full un

afdeling cu ta dedica na loke ta e procesamento di peticion di cuido medico den exterior,

pero tambe na e parti di cumpli mas lihe cu por cu un cita den exterior.

Vooral cu e pais Colombia, ta traha cu varios clinica eynan ta purba mas lihe posibel pa

duna e pashentnan di Aruba un cita.

Loke sa sosode ta cu dentro di e proceso na Aruba tin ora por haya situacionnan unda por

ehempel aparato di hospital ta daña of tin un mashin cu mester mantenemento.
Igualmente sa sosode den exterior cu pashentnan ta yega net den un periodo cu kisas e

hospitalnan tambe ta bezig cu mantencion of reparacion di cierto aparatonan.

E no ta sosode hopi pero si e sa sosode. E ora ey berdad bo por haya un periodo di espera

un poco mas largo.