Page 59 - MIN ON 26 JUNE 2017

Dia 22 di Juni tabata ultimo dia pa por a inscribi un partido
na Conseho Electoral

Sunday, 25 June 2017 16:56
Comparti

Dia 22 di Juni, tabata e ultimo dia cu por a inscribi un partido na Conseho Electoral den e registro cu
Conseho Electoral ta tene. Segun presidente di Conseho Electoral
, Hubert Maduro, bo por registra despues, pero bo no lo por participa na e eleccion dia 22 di
September mas. Tin awor aki den e ultimo aña y mey, cuminsamento na 2015, a bin un partido, djey
tres mas. Awor aki tin 4 partido nobo a inscribi den e periodo cu a caba dia 22 di Juni. En total segun
Maduro, ta bay participa 5 partido mas, total di nuebe partido. Tin e partidonan grandi. Tin e
partidonan cu no a saca asiento ultimo biaha y toch nan tey atrobe. Total nuebe partido lo entrega
lista.
Kico lo bay sosode
Segun Maduro, den e proceso di eleccion di 2017 awor aki e siguiente dia importante ta dia 4 di Juli, cu
e registro di votado ta wordo cera. Esey ta e dia cu un programa ta saca for di e database di Censo, e ta
saca un lista cu votado. Despues di esey, ta bay pa Augustus, y diabierna, 4 di Augustus, lo ta e dia
designa pa entrega lista. Esey ta for di 8’or di mainta te cu 4’or di atardi, por entrega lista.
Simannan cu ta bin despues di esey, lo ta simannan cu e partidonan cu mester cumpli cu e rekisito cu
nan tin pa haya un cantidad di firma. Ta casi 600 firma cu nan mester pa nan por participa. Tin dos
siman poni pa esey. Despues di esey, tin un reunion di Conseho Electoral na ultimo siman di Augustus,
cu ta determina cua partido y cua hendenan riba e listanan ta participa. Esey ta e decision definitivo.
For di eynan unico cos cu ta haci, ta bay hues y si bo no ta di acuerdo cu decision di Conseho Electoral
pa determina cua hende ta riba lista.
Parti di e trabao
E trabao grandi ta wordo haci door di hendenan di censo, pasobra nan ta haya e listanan y cada
persona riba e lista, ta wordo controla. E datonan ta wordo controla. Censo tin e database grandi
di poblacion di Aruba. Nan ta controla nan fecha di nacemento, luga cu nan a nace y si tin edad cu no
ta mustra cu nan no por vota. Nacionalidad tambe ta wordo revisa.
Luga di entregamento di lista
Ainda no tin un luga caminda cu lo bay entrega lista. Mester di un luga grandi. E partidonan grandi
kier un luga caminda cu e camaranan di tur e stacionnan di television por para.