Page 3 - HOH

Diasabra, 8 November 2025 AWEMainta
Influencia ta poder y poder
sin responsabilidad ta abuso
INFLUENCERNAN mester ta legalmente obliga pa divulga
ora nan ta gaña of manipula den nan contenido? E pregunta
ta zona extremo — te ora bo realisa cu ya caba nos ta exigi
esaki di tur otro comunicado comercial den un sociedad cu
ta funciona. Si un banco gaña cliente, esey ta fraude. Si un
compania sconde efectonan secundario di un producto, e
ta negligencia criminal. Si un politico gaña den documenta-
cion oficial, e ta un scandal. Pero un ‘influencer’ cu 5 miyon
hoben impresionabel, cu ta recomenda un producto cu e no
ta uza nunca, ta priminti resultado cu e no a logra nunca, ta
pusha un estilo di bida cu e no ta biba, of ta post “propa-
ganda scondi” fingiendo cu nan ta opinionnan autentico —
nada no ta pasa.
‘Influencers’ awe ta esencialmente agencianan di mercadeo
(‘marketing’) no-regula cu un alcance masivo den tempo
real. Nan no ta ciudadanonan priva cu casualmente ta
expresa opinion mas. Nan ta operadonan comercial den e
economia di persuasion. Y e daño no ta hipotetico. Na Reino
Uni, e Autoridad di Standardnan di Publicidad (Advertising
Standards Authority) ya a raporta un explosion den keho
specificamente tocante ‘influencers’. Na Merca, e FTC
(Comision Federal di Comercio) mester a publica liñanan
di guia completo pasobra mayoria di e ‘postnan’ patrocina
(‘sponsored’) no tin divulgacion cla. Na Australia, gobierno
literalmente mester a cuminsa ‘sweep’ (control) riba TikTok
pasobra ‘influencers’ di ‘fitness’ tabata inventa afirma-
cionnan cientifico pa pusha productonan di dieta.
Nos no ta papiando di “libertad di expresion” aki. Nos ta
papiando di mensahenan comercial disfrasa como opinion
personal. E economia di ‘influencer’ a haya un ‘loophole’
(un buraco den ley): Nan ta uza intimidad como arma.
Nan ta reduci e distancia psicologico entre bendedo y
cumprado. Un modelo por bende un crema pretendiendo cu
e “a hay’e su mes riba Amazon”. Un ‘influencer’ di finansa
por ‘pump’ (hisa prijs di) un ‘crypto coin’ dor di presenta
su mes como bo primo mayor amabel cu “djis kier yuda bo
traha rikesa”. Un guru di relacion por promove un curso di
terapia pasobra “e la cur’e”. Y e publico ta cumpra e nara-
tivo pasobra e empake ta parce confiansa.
Ora nos bisa “regula ‘influencers’”, e no ta un crusada moral.
E ta un principio simpel: Si bo ta probecha (gana placa) di
LOCAL 3
e persuasion di bo audiencia, bo mester divulga e berdad
tocante e persuasion ey.
E mesun manera cu a forsa tabaco pa pone ‘label’ (etiketa)
di advertencia, y a forsa companianan grandi di cuminda pa
revela caloria, mester forsa ‘influencers’ pa pone ‘label’ riba
manipulacion.
Mester tin consecuencia legal pa 3 zona:
1. Placa scondi. Si bo wordo paga pa un producto of opinion
y bo no ta revel’e — esey ta engaño di consumido.
2. Afirmacionnan personal falso. Transformacionnan di
prome/despues (curpa, cuero, cabey), “curanan” di salud
auto-inventa, ‘hacknan’ (triki) di productividad falso —
esaki ta daño cu por ser midi.
3. Experticio fabrica. Inventa credencial, inventa acceso,
inventa autoridad — esaki mester activa castigo (penalidad)
mesora.
E economia di ‘influencer’ lo argumenta cu esaki lo “mata
creatividad”. Esey, sinembargo no ta berdad. Creadonan
honesto lo no ser afecta. Solamente e modelo basa riba
fraude lo sufri. Y si bo modelo di negoshi ta colapsa ora bo
wordo forsa pa bisa e berdad — bo negoshi tabata fraude
desde comienso.
Nos ta regula tur otro industria unda e psicologia di hende
ta ser ataca (‘targeted’) directamente pa ganashi. Influencia
ta e moneda di mas poderoso awe. Esey ta nifica cu influ-
encia no por keda e unico mercado no-regula. ‘Influencers’
kier e placa manera negoshi — nan mester carga e respon-
sabilidad (‘accountability’) manera negoshi.