Page 72 - MIN TTC 8 OCT 2015
P. 72
Minister Otmar Oduber a ricibi relato di Parada
Cultural
Wednesday, 07 October 2015 18:35
Comparti
Diaranson mainta Minister Otmar Oduber a ricibi bishita di Sr. Francisco “Chico” Harms y Sra. Ifna
Noguera di Centro di Bario Brazil.
Nan a haci entrega di e relato di e Parada Cultural cu a tuma lugar recientemente y cu aña tras di aña ta
hayando mas y mas acogida. Tambe nan a probecha e ocasion pa entrega e mandatario un plakaat como
muestra di aprecio pa su contribucion na e Parada Cultural.
Sr. Harms a bisa cu e plakaat ta un reconocemento na Minister Oduber pasobra sin su contribucion nan
no lo por tabatin un actividad asina exitoso. Tambe a bisa cu nan a bishita Minister pa bise con tur cos a
bay y kico por spera di e Parada Cultural pa futuro.
Chico Harms a indica tambe e exito di e Parada Cultural cu den apenas 5 aña di tempo a pasa di 300 pa
900 participante y e sosten ta mas cu bon bini pasobra e trabounan tambe ta birando mas grandi dia pa
dia. Fecha pa e Parada Cultural di otro aña ta stipula caba y e lo bira 4 di septemer mietras cu prome cu
esaki lo tin un otro actividad cu lo wordo anuncia despues.
Minister Oduber a bisa cu a tende hopi di e Parada Cultural y ora a sinta na mesa cu nan por a mira cu ta
trata di un organizacion serio y entrega di e relato ta mustra esaki tambe. E mandatario a felicitanan
tambe pasobra no ta hopi organizacion ta traha den e forma aki cu un relato asina detaya.
“Ta yenami cu un satisfaccion grandi cu e reconocemento na momento cu Gobierno a traves di fondonan
publico yuda organizacionnan asina y nan ta responde tambe na un forma hopi profesional y cu ta ofrece e
claridad y transparencia necesario”, Minister Otmar Oduber a declara.
Finalizando Minister Oduber a compromete na sigui sostene e Parada Cultural y a encurasha Centro di
Bario Brazil y henter e comitiva pa continua cune. “Mi ta hacie cu hopi satisfaccion y nos palabra caba cu
lo acerca Departamento di Cultura den su rol nobo cu ta duna mas asistencia, pa sostene e actividad aki y
henter e organizacion”.
