Page 76 - MIN TTC 8 OCT 2015

SMAC a entrega cuentanan anual di e organizacion na Minister Otmar
Oduber
Wednesday, 07 October 2015 18:36

Comparti

Diaranson merdia Minister Otmar Oduber a ricibi for di man di presidente di SMAC, Randy Thiel, e
cuentanan anual di e organizacion di Carnaval aki.

Minister Oduber a bisa cu aña pasa tabata uno di transicion cu na e momentonan ey a spera cu ta pa
miho, a haya cu den un tempo relativamente corto cu e organizacion SMAC a haya pa traha a pone un
Carnaval riba pia despues di un Carnaval 60 asina grandi y cu hopi turbulencia.
“Awe mi ta sumamente contento pasobra parti di e exigencianan cu tabatin y parti di e statuut como
tambe di e rapport traha pa profesionalnan tabata e transparencia. Esaki ta loke e gruponan tabata busca
y cu entrega di e jaarrekening aki y cu den luna di october ta presenta e programa di Carnaval pa otro aña
ta mustra cu dos di e inkietudnan grandi cu tabatin ta wordo cumpli cu nan”, Minister Oduber a declara.
Randy Thiel a bisa cu esaki ta un dia historico pa Carnaval di Aruba unda cu SMAC ta cumpliendo cu e
transparencia cu nan a priminti entregando na Minister, pueblo y gruponan di Carnaval e cuentanan
anual di SMAC. Esaki ta e prome cuentanan anual di un organizacion di Carnaval den 60 aña di existencia
di nos Carnaval,
Sr. Thiel a gradici Aldrick Croes cu a yudanan hopi y tambe na Leysner & de Cuba pa cu e cuentanan
anual. El a bisa cu a practicamente break even, pero cu ainda tin algun cos cu mester ahusta.
Minister Oduber a felicita y encurasha e grupo di SMAC pa sigui cu e entusiasmo pa cu e temporada 62 di
nos Carnaval. E mandatario ta sigur cu e lo bira uno grandi un biaha mas y ta pidi comercio en general pa
sostene e organizacion di Carnaval y e voluntarionan cu ta yuda den dje.