Page 69 - AVP
P. 69
El a splica cu na Januari Venezuela a pidi pa sinta cu Aruba y Corsow na mesa pa
cuminza papia riba habrimento di e frontera.
“Nos a bisa cu nos no ta bay habri e frontera y cu nos a caba di prolonga ciere di e
frontera cu tres luna mas, esta te cu Juni”.
“Sinembargo, ta importante si pa papia, pa ta na altura di kico ta wordo papia”.
“E reunion na dado momento a wordo cancela, pasobra e delegacion di Venezuela no
por a viaha”, segun Croes, kende a confirma cu e reunion a wordo posponi te cu awe y
cu e ta bay tuma lugar na Corsow.
El a sigui bisa cu mientrastanto Aruba a cuminza mira si no tin e posibilidad pa toch
habri e frontera pa loke ta trata nos frontera maritimo, pa Aruba por importa fruta y
berdura bek for di Venezuela, bao di cierto condicion.
“E condicionnan ta entre otro cu mester wak e calidad y mester wak pa e prijsnan keda
faborable etc”.
“Mester tin condicionnan estricto si cu ta fruta y berdura so ta bin den e botonan y no
cu bao di e frutanan tin otro cosnan scondi”, segun Croes.
El a indica cu esey pues ta e meta di e reunion, unda cu lo delibera y mira bao di ki
condicionnan Aruba lo por yega na un eventual reapertura di frontera cu Venezuela.
“E sentimentonan na Corsow ta diferente na esunnan di Aruba”.
“Na Aruba nos ta prefera ainda di no habri e frontera y specialmente awor cu tin e
retonan di Coronavirus nos mester ta hopi mas cauteloso”.
“Sinembargo, nos ta bay wak kico ta bay sali for di e reunion ey”, segun Prome
Minister.
https://www.diario.aw/2020/03/prome-minister-a-confirma-cu-awe-aruba-corsow-y-venezuela-ta-bay-
reuni-riba-reapertura-di-frontera/
