Page 73 - AVP

For di su entrada, e actual Ministro Presidente tabata na haltura cu lo no tabata facil
asumi e responsabilidad cu el a acepta.

Na 2018 dos aspecto pisa a bini dilanti. E mester a splica pueblo di Aruba, cu e

proyecto refineria tabata tin tur indicacion cu e lo fracasa. E mester a tuma contacto cu
Citgo, cu na 2019 a admiti cu no por realisa e proyecto.

Pa Aruba e realidad tabata amargo, sigur debi na e otro punto cu tabata e situacion

financiero cu a exigi pa inmediatamente introduci e prome pakete di medida.

Na 2019 Aruba a traha riba 2020 como un aña den cual crecemento economico lo a
wordo logra pa asina e base di entrada di pueblo bira mas hancho.

Gabinete Wever-Croes no tabata na haltura cu un desaroyo historico lo a crea un caos
mundial, cu awe ta e realidad cu Aruba mester enfrenta.

Turismo di Aruba a drenta un crisis total na momento cu gobierno di Merca, ta pidi
ciudadanonan di e pais mas grandi di origen di turista pa Aruba, pa no biaha.

Crecemento economico tabata un necesidad grandi pa Aruba. Awe e situacion petrolero

mundial ta uni na e coronavirus nobo, pa crea e menasa di un depresion mundial.

Atrobe Aruba ta wordo presenta cu un crisis grandi na e momento cu el a pensa di a
alcansa un epoca nobo.

Na 1985, Lago a bandona Aruba na momento cu e pais tabata prepara pa su Status
Aparte. Sinembargo, tabata hustamente e condicionnan di Status Aparte cu tabata e
herencia grandi di Betico Croes, cu a haci posibel pa Aruba a crea un futuro nobo.

Awe mundo ta den incertidumbre grandi sin por pronostica su futuro debi na un malesa,
cu a causa caida di economia y situacion financiero mundial.

Den e situacion aki, Ministro Presidente Evelyn Wever-Croes y su gabinete, mester
dirigi Aruba y mester mantene su agenda di actividadnan y responsabilidad enorme pa
e pais.