Page 69 - KPA

Cuatro homber a wordo acusa di a tira un atraco dia 31 di mart ultimo na Hulpbestuurs kantoor na
savaneta. Esaki a sosode den pleno luz di dia y na momento cu e vehiculo a yega pa busca placa di
dia.

Nan tabata para pafo di e oficina, algun na e parada di bus y un den un vehiculo. Personal di e
vehiculo di transporte a wordo ataca di patras y a trata di kita e arma for di nan.

Nan a bay cu un caha y un tas cu placa, pero pa nan mala suerte tabatin polis na civil den bisindario,

kendenan a bati alarma asina cu un tiro a cay. Mientras cu nan a huy for di e sitio den un Nissan
Sentra, e funcionarionan na civil a sigui nan tras te den area di Pos Chiquito. A gara un prome y
despues dos mas y e di tres algun dia despues.

E acusadonan aki, apesar cu testigonan a reconoce nan, ta nenga di tabata envolvi den e atraco aki.

Tur e personanan cu a comete e delito tabatin nan cara tapa na momento cu e hecho a tuma luga.

Den Corte a wordo mustra na e acusadonan dos grabacion, uno di HBK cu no tabata mucho visible y
un grabacion di un negoshi den bisindario cu tabata di miho calidad. Pero a keda persisti cu e

personanan cu a comete e atraco no ta nan. Rene P. a bisa cu el a wordo aresta na momento cu el a
bay cumpra marihuana pa bende, pesey el a spanta ora cu el a mira Polis. Su ruman Israel P. a bisa cu
e no por tabata esun cu a comete atraco pasobra su pia tabata lesion y den su auto e tabatin un kruk

pa e cana cune. Ora cu el a wordo deteni, el a bay cumpra droga y Marvin H. tabata cune. E ultimo
aki tabata cu e acusado Rene., pero a spanta ora cu el a mira Polis ya cu e tabata sa cu Rene tabata
bay pa cumpra droga y el a baha auto na careda. El a pidi Israel un lift, pero e acusado aki a baha bek

un rato despues ora cu el a mira tin hende ta persigui nan. Esaki ta nan storia di con nan tabata den e
area di Sabana Basora / Pos Chiquito na momento cu Polis tabata pesiguiendo e atracadornan den
autonan mescos cu nan tabata aden.

Fiscal no tabatin piedad cu nan y a bisa cu hunto nan a comete e atraco y pa tur el a pidi 5 aña
incondicional.