Page 62 - Min Vos, 24 April 2015

Placa cu Koninging Wilhelminafonds colecta riba caya ta bay directamente pa
ayudo na pashentnan di cancer

Publication: Friday, 24 April 2015. Categoria: General

ORANJESTAD (AAN) E trabou cu Koninging Wilhelminafonds ta haciendo ta algo cu a surgi
como un pensamento di Reina Wilhelmina. Un causa cu tabata masha hopi na su curason. Aki na
Aruba, ora cu papia di Koninging Wilhelminafonds mesora e pensamento ta bay riba e persona
cu a bin ta guia e fundacion aki pa hopi aña, Lilly Prins y kende ta haciendo e trabou cu un amor
grandi pa brinda un grupo vulnerabel den comunidad.

Sra. Lilly Prins pa hopi aña caba ta e cara di e fundacion aki cu ta haciendo un gran trabou pa un
grupo special di pashent, esta esnan cu ta sufri di cancer, durante e momentonan dificil di nan
bida. Esaki ta e di 54 aña cu e fundacion ta haciendo e campaña di recauda fondo den luna di
april den nan mas di 60 aña di existencia.

E fundacion a wordo lanta tempo cu Reina Wilhelmina a entrega su corona na su yiu Reina
Juliana. E nacion tabata kier a duna un regalo na Reina Wilhelmina, el a pidi cu loke tabata
wordo colecta bou di comunidad wordo hinca den un fundacion cu ta bay traha pa pashentnan di
cancer. Asina e fundacion a wordo lanta na Hulanda y na Corsou. E tempo ey Aruba tabata cay
bou dominio di Corsou y tur decision di y pa Aruba tabata wordo tuma na Corsou. Pero na 1961,
ora cu e directiva presidi pa Irma Beaujon Brouwer (d.f.m.) a firma e prome statuut y a cuminsa
traha pa e fundacion di Aruba. E tempo ey ta masha poco pashent tabata acudi na e Fundacion pa
ayudo.

Koninging Wilhelminafonds Aruba a cuminsa cu su proyecto di protese na 1982. E señora cu a
wordo opera a haya un set di protese, un brassiere y despues di seis pa ocho siman, e ta bolbe
cerca e fundacion pa haya su dos silicon protese mas tres BH special.

E siguiente fase di trabou cu e fundacion a cuminsa cune tabata pa brinda cuido di pashent na
cas. Tabata haci esaki, segun sra. Prins, den cooperacion cu Wit Gele Kruis. KWF tabata paga e
contribucion anual y e bañamento pa e pashent. Cu transcurso di aña a sigui amplia e ayudo cu
nan ta brinda na pashentnan di cancer. Uno importante a bira e asistencia cu e fundacion ta duna
na pashentnan cu ta wordo manda den exterior pa tratamento. Ta papia aki di ayudo financiero.
A bini cu peluca pa e pashentnan cu ta perde cabey ora di quimoterapia, tin e proyecto di
transporte pa tratamento na Oncologia of dokter v.v.. Hopi famia no ta traha y no tin chens pa
Sali pa cumpli cu tur e citanan di dokter y tratamentonan.