Page 8 - MIN JUS 1 DEC 2015

Hues a condena preso cu a morde cuidador den KIA

Publication: Tuesday, 1 December 2015. Categoria: Judicial

ORANJESTAD (AAN) – Un preso, kende ta sufriendo di problema mental, a agredi un
cuidador di preso. Ta trata aki di e preso G.M., kende diabierna a wordo condena na 5 aña di
prison pa un serie di delito cu el a haci y tambe e asalto arma na Crown Boulevard.

Den Corte por a ripara cu G.M. tabata hopi agresivo. El a hasta insulta Hues ora el a scucha su
castigo.

Despues cu el a bay, ariba e lista di casonan pendiente, su nomber ta aparece atrobe. A resulta cu
esey ta un caso di maltrato di un cuidador di preso. Hues a bisa cu G.M. no kier a presenta pa e
caso ey.

Fiscal a bisa Hues cu tin un raport medico cu ta mustra cu e cuidador di preso a wordo maltrata
door di G.M. Na opinion di Fiscal, segun maneho di Ministerio Publico, normal pa maltrata ta
exigi un boet pero mirando cu den e caso aki G.M. a bay asina ley di morde e cuidador di
preso, e ta haya cu mester duna un castigo di prison. Fiscal a exigi 2 luna di prison.

Hues a sera tratamento di e caso y a dicta sentencia di biaha. Hues a bisa cu ta asina cu G.M. no
kier a papia cu Polis, pues no tin ningun declaracion di dje. Ademas ta asina cu G.M. no kier a
presenta den Corte.

Hues a mustra cu segun ley, e mester tene cuenta cu e castigo cu ya caba a condena e acusado.
Hues a bisa cu teniendo cuenta cu ya caba G.M. a wordo condena na 5 aña di prison, e ta inclui e
delito aki tambe den e serie di delitonan cu ya caba G.M. a wordo condena p’e. Esaki ta nifica cu
G.M. ta keda cu e castigo di 5 aña di prison.

http://www.diario.aw/2015/12/hues-a-condena-preso-cu-a-morde-cuidador-den-kia/