Page 59 - MIN ON 18 NOV 2015

Rector di Colegio Arubano a prohibi entrada di Meneer
Capelo na scol

Publication: Wednesday, 18 November 2015. Categoria: General

ORANJESTAD(AAN): No ta un secreto cu e relacion entre e Rector di Colegio Arubano, Drs.
Hans Timmermans y e docente Alfredo Capelo no tabata di e miho forma.
Ora cu tur hende a pensa cu e situacion a calma y normalisa despues cu Meneer Capelo a opta pa
bay cu pensioen, ta resulta cu net lo contrario ta sosodiendo.
Consecuentemente, e Rector di Colegio Arubano a prohibi entrada di Meneer Capelo riba tereno
di scol. Asina docentenan di e scol a sigura na nos.
Por corda ainda e incidentenan cu a tuma luga na comienso di September na Colegio Arubano
despues cu meneer Capelo a tuma su retiro a base di un disputa cu e rector nobo di Colegio
Arubano. E retiro repentino di meneer Capelo a trece cune un cantidad grandi di reaccion for di
comunidad y tambe un accion di parti di e alumnonan cu ta sostene meneer Capelo.
Despues di un periodo relativamente trankilo y cu a duna e impresion cu e partidonan a yega na
otro, awo ta resulta cu e situacion a escala mas ainda y cu consecuencia cu meneer Capelo no ta
bonbini mas na e scol.
Despues di e retiro di meneer Capelo a haci palabracionnan cu e meneer den cuestion lo keda
envolvi cu e diferente actividadnan social na e scol y cu lo sigui cu e organisacion di entre otro e
biahe di HAVO 4.
Segun nos a compronde cu esaki ta un palabracion cu a ser haci hunto cu e Raad van Toezicht di
SMOA pa asina trece trankilidad bek na scol. Pero for di fuentenan nos a compronde cu esaki no
a cay na agrado di e rector nobo, kende no tabata contento at all cu e presencia di meneer Capelo
na scol.