Page 24 - AWM 21MAART,2016

24 AWEMainta Dialuna, 21 Maart 2016

Parlamentarionan di MEP presenta na acto
protocolario Dia di Himno y Bandera

“Bunita celebracion,
cu excepcion e
discurso di Prome
Minister”

PARLAMENTARIONAN di MEP, Evelyn Wever-Croes, Glenbert

Croes, Chris Romero y Guillfred Besaril a asisti n’e acto protocolario
di Dia di Himno y Bandera na Bestuurskantoor.
“Desde cu Gobierno di Mike Eman a hala e celebracion aki for di
Plaza Betico Croes pa aki dilanti Bestuurskantoor, nos fraccion no a
asisti mas, pa demostra cu nos ta contra e esfuersonan di Gabinete
Mike Eman pa falsifica nos historia y nenga e papel importante
cu Betico Croes a hunga pa realisa nos Himno, nos Bandera y nos
Status Aparte.

Pero e aña aki, en bista di celebracion di 40 aña di nos Himno y
nos Bandera, nos a haci un excepcion y nos a acudi. E tabata un
bunita celebracion, y e canto di e Coro Nacional di 40 aña pasa
bou dirigencia di sra. Maybeline Arends-Croes tabata sumamente
impresionante.
E desfilenan tambe tabata bunita. Un gran pabien p’esaki.
E discursonan si a laga hopi di desea, especialmente esun di Prome
Minister Mike Eman, kende a comporta su mes sinceramente
na forma poco bochornoso, imitando un pasion cu e no ta sinti
realmente.
Su interpretacion nobo di e historia di nos pais, y di nos Status
Aparte tampoco mi ta comparti, y danki Dios di tur hende cu mi a
combersa cune, ningun a kere su storia tampoco, pues mi no mester
kibra cabes pa desbarata e mentira ey.

Mi ta lamenta si cuanto esfuerso y energia sr. Mike Eman ta hinca
cada aña pa nenga e logronan di sr. Betico Croes.
Dicon e no por demostra sikiera un tiki di e grandesa cu sr. Betico
Croes si a demostra, ora cu sr. Betico Croes a laga traha e plaza di
Henny Eman? Si sr. Eman realmente un dia kier bira un politico
grandi, di taya di Betico, e mester cuminsa stop di manipula historia.
E simple hecho cu cada aña e ta inventa un otro storia di nos Status
Aparte ta prueba cu e no ta sincero.
Tambe mi mester remarca cu e asistencia di parti di gobernante y
Parlamentarionan di AVP ta masha pober.

Presidente di Parlamento ni su suplente tabata presente, dos di e
13 Parlamentarionan so di AVP tabata presente, y di e Ministernan
a falta algun tambe. Esaki ta un falta di respet grandi.
Nan ta cla pa bay celebra Arubadag na Hulanda, pero no tin interes
pa celebra nos dia di himno y bandera na Aruba. Esey ta un señal
di poco respet y stimacion pa nos himno, nos bandera y nos pais.
Pero lagando tur esey un banda, awe ta dia pa celebra, y permitimi
felicita e pueblo di Aruba cu e gran dia di awe, ban celebra e dia
aki den grandi demostrando nos orguyo di ta Arubiano, y nos
stimacion pa nos pais Aruba”, tabata palabranan di lider di MEP,
Evelyn Wever-Croes.