Page 60 - MIN JUS 12 APRIL 2016

Monday, 11 April 2016 08:17
Comparti

Polis ta haci masha bon trabou na Aruba. Polis ta soluciona 70% di casonan criminal na Aruba. Na
Hulanda nan no ta ni yega serca di logra esey."Esey ta loke e Procuror General di Aruba, mr. Marc van
Erve, a bisa entre otro diabierna atradi. Sr. van Erve ta tuma despedida di Aruba como Procuror General.

E funcion cu ela ocupa durante di tres aña y mey. Ela usa e ocasion di su despedida pa bisa algun cos
importante tocante di funcionamento di husticia na Aruba. E elogio na cuerpo di polis y na e minister di
Husticia sr. Arthur Dowers a sobresali den su discurso. E tabata tin critica tambe. Entre otro cu
Ministerio Publico mester haya un edificio nobo, pasobra esun cu nan ta aden no ta adecuado mas y ta
lek hopi.

POLIS

E procuror general ta sumamente conciente di loke ta biba den comunidad. E sa di e critica cu tin riba
combatimento di criminalidad, e critica riba Ministerio Publico y e limitacionnan di un pais chikito
manera Aruba. Sinembargo ela haya necesario pa duna elogio na e cuerpo di polis cu segun e ta haci un
bon trabou. E echo cu entre otro 70% di tur caso di actonan criminal ta wordo soluciona, ta un echo cu
mester para keto na dje. Sr. Van Erve a mustra cu pa un pais chikito manera Aruba esaki ta remarcabel.
Pero compara cu otro paisnan den Reino, manera Hulanda tambe e resultado di casonan soluciona hopi
bon. Den su palabranan, na Hulanda nan ta leu di logra un nivel di casonan soluciona asina halto. Ela
mustra tambe cu mester di mas polis. Pero asina mes, e resultado ta hopi bon segun procuror van Erve.

RELACION CU MINISTER DOWERS

E procuror general a duna danki tambe na e minister di Husticia Arthur Dowers, pa e bon relacion di
trabou. E procuror a bisa cu no semper e relacion entre un minister di husticia y e procuror general ta
bon. No na Aruba so. Ela mustra cu minister Dowers semper tabata sa te unda e bay pa no mete cu e
caracter independiente di Ministerio Publico. Esaki tambe ela considera algo di elogia, pasobra
experiencia ta mustra hopi biaha lo contrario. E echonan aki, di un bon relacion entre e minister
(politico) cu sa bon con pa anda cu Ministerio Publico y e bon funcionamento di polis, ta splica
parcialmente e trankilidad y stabilidad na Aruba, compara cu otro paisnan.