Page 93 - MIN VOS

Dr. Melissa de Meza: Semper haci loke Bo gusta

Tuesday, 06 June 2017 21:41
Comparti

Dr. Melissa de Meza a caba di gradua como “Basis Arts” y a participa den e Health Care Conference
Aruba 2017.
El a gradici HCCA pa dun’e oportunidad pa presenta como un recien graduado. “E tabata hopi leuk pa
papia cu studiantenan, pasobra mi mes tabata un studiante. Kico mi a duna specialmente como tip ta cu
semper bo tin cu haci kico bo gusta pasobra nunca e lo sinti manera e ta un dia di trabou”, asina dr.
Melissa de Meza a expresa.
E proceso no tabata facil pa Melissa de Meza ora el a scoge un profesion specialisa pasobra pa dal un stap
pa bay Hulanda despues di a termina VWO, studia 6 aña largo, e ta algo cu e persona mester stima si no
por wanta esaki. Hopi “Bachelor” ta 3 aña y “Masters” ta 1 aña y esey ta 4 aña caba. Pero e ta kere cu ta
importante pa studiantenan realisa cu ta un compromiso nan ta haci, pasobra e ta un compromiso pa nan
mes y na final ta pa futuro di Aruba.
Ta spera cu un gran parti di esunnan cu ta bay studia afo, ta regresa Aruba. No solamente dokternan,
pero tambe nursenan, hendenan cu ta studia pa traha den salubridad. Ta importante pa nan bin bek y
aporta den salubridad di Aruba y comunidad.
“E congreso tabata hopi productivo. Tabatin un grupo masha grandi di EPI cu tabatin muchanan hopi
entusiasma. Y mi ta spera cu mi a motiva nan un tiki extra pa nan por haci nan escogencia den nan
estudio y sigui pa esey. E reaccionnan tabata hopi positivo, hopi mucha cu hopi gana pa yuda Aruba. Mi
ta hopi positivo di esey”, asina dr. Melissa de Meza a expresa.
E siguiente paso pa Melissa de Meza ta cu e ta regresa Hulanda unda e ta trahando como “Arts niet in
opleiding” na un Hospital chikito. E kier specialisa den dermatologia y esey tambe ta un proceso hopi
largo. Aki un par di aña mas Melissa de Meza lo ta bek na Aruba. E ta yiu di Minister Ing. Mike de Meza y
Dr. Brigitte Every-de Meza.