Page 95 - MIN VOS

Empresario local hoben ta contribui na revitalisacion di
centro di Oranjestad

Tuesday, 06 June 2017 20:18
Comparti

Mas inversionista ta sigui drenta centro di ciudad complementando asina e vision di Gobierno di Aruba pa revitalisa e ambiente social y
actividad comercial den Oranjestad.
E mas reciente proyecto cu ta wak su inicio ta un gym y café saludabel cu ta bin den bicindario di Klip. Diamars mainta Prome Minister Mike
Eman y Minister di Infrastructura Benny Sevinger a bishita e edificio di ex pompstation na Lagoen caminda a topa cu e huurdo nobo pa
conoce mas detaye di su plannan y haci e anuncio oficial.
Minister President Eman a splica cu e edificio iconico den bario di Klip ta uno cu tin un historia rico pa tur esnan cu a lanta y ainda ta biba
den e bario; su mes inclui. Pesey mes, e ta hopi contento cu e edificio, cu tabata algun aña para sin uso, awo ta bay haya un destinacion
comunitario. Den contacto cu Javier Erasmus di Muscles & Lungs Crossfit, a wak e posibilidad di bin cu un gym y duna hoben y adulto e
oportunidad di haci ehercicio y hiba un bida mas saludabel.
Premier Eman a splica cu gobierno su papel den esaki tabata pa haci e edificio disponibel na un huur cu no ta hopi pisa pa un negoshi cu ta
cuminsa y cu ademas ta haciendo un inversion cuantioso pa su renobacion. “Sigur lo ta un contribucion pa e bario,” Eman a expresa.
Trabounan di limpiesa, reparacion y renobacion ta cuminsa den luna di juli y ta calcula cu lo tuma un periodo di 5 luna. Na final, e edificio lo
conta cu area di gym cu su aparatonan, café cu area pafo, pero tambe baño y lockerrooms.
Erasmus ta un di tantisimo hobennan cu durante ultimo añanan di Gabinete Mike Eman a destaca como parti di su programa di
reconocemento ‘Hoben y Talentoso’. E entrenador di crossfit ta comparti e vision di Prome Minister Eman pa impulsa un curpa sano y
mente sano haciendo facilidadnan di ehercicio y recreacion mas accesibel den tur bario.

Minister Benny Sevinger, titular di Infrastructura y bou di ken e maneho di e edificio ta cay, a felicita Erasmus y su famia pa e iniciativa
tuma. “E idea ta cay perfecto den e lista di edificio pa wordo renoba pasobra nos plan ta pa drecha e parti di lagoen y conecta esaki cu Linear
Park, dus e ta pas den henter e masterplan di Oranjestad y desaroyo di infrastrutura di nos pais,” Sevinger a splica.