Page 112 - KPA_Neat

Minister Paul Croes despues di casi 3 Luna ainda nada

Sunday, 25 June 2017 17:19
Comparti

Durante su prome rueda di prensa diasabra ultimo Minister Paul Croes hunto cu su abogado sra. mr.
Marije Vaders a kibra silencio riba e caso contra su persona.
"Despues di 3 luna cu autoridad nan hudicial a hasi entrada na mi cas ainda nos no a haya e motibonan
concreto y claridad riba e caso contra mi persona. Pa bo a hasi un huiszoeking di e embergadura aki, mi
tin derecho mescos tur ciudadano di e pais aki riba motibo y informacionan riba mi caso. Basicamente
nos ta 1 milimeter mas leu cu 28 di maart 2017. Despues di casi 3 luna practicamente nada!", asina e
Minister a declara. Riba conseho di su abogado a dicidi di no duna declaracion na prensa. Diasabra
ultimo tabata e prome encuentro cu prensa. Minister Croes a splica cu e y su famia ta pasando den
momentonan duro y dificil. E la discribi e situacion como uno traumatico y emocional pa su famia,
trahadornan y amistad. Abogado Vaders tambe a mustra cu e caso aki ta mustra hopi straño ya for di su
inicio. "Pa un ciudadano por prepara su mes pa defende su mes den corte contra cualkier acusacion, e
mester recibi e acusacionan aki. Te ainda nos no tin motibo concreto riba esaki", mr. Marije Vaders a
declara. Di otro banda Minister Paul Croes a mustra cu no ta pidiendo nada inhusto.
"Boso a drenta mi cas den un forma hopi fuerte. Boso a bin cu cacho pa busca placa, droga of arma. Nada
di esaki a wordo haya. E señora haya na mi cas no tabata illegal. Awo locual mi ta exigi ta dunami e
motibonan concreto di e accion grandi aki", sr. Croes a bisa. Pa motibo di locual ta sosodiendo den su
caso e Minister a declara asta cu e ta trece hopi duda den e proceder di OM den e caso (IBIS) aki.