Page 43 - MIN ON 12 APRIL 2016

AWEMainta Diamars, 12 April 2016 29

Charlene Bontekoe
ta gradua cu un
titulo di “Bachelor in
Social Work”

RIBA 15 di december 2015, Charlene Bontekoe a gradua cu un

“Bachelor in Social Work and Development” na Universidad di
Aruba.

Durante e cuatro añanan di e programa, Charlene semper a presenta
su mes como un feminista, un cu interes pa topiconan cu ta afecta
hende muher. Como tal, e titulo di su tesis ta The Story of Hope:
Her life as the definition of domestic violence - Experiences with
service providers in Aruba.
E miembronan di e comision di evaluacion tabata sra. Roslin Kock,
Professional and Society Practice na Universidad, sra. Sandra Brown,
Directora di CEDHEM y sra. Clementia Eugene, Research Coach.

E estudio tabata un single case study cualitativo di un victima di
violencia domestico y su experiencia cu tres instancianan cu ta
brinda servicio na Aruba. E resultadonan ta indica cu e servicio cu
e organisacionnan aki a brinda tabata optimal, pero Hope a keda
pega den e ciclo di violencia pa 11 aña.
Charlene a splica e perspectiva individualista y colectivista cultural
di Yoshioka & Choi (2005) como e cuadra teorico pa su estudio.
El a splica cu Hope a permanece den e relacion di violencia domestico
pa motibo cu e organisacionnan no a para keto na su necesidad pa
empoder’e dor di haci un analisis di su balornan cultural colectivista.
Charlene ta recomenda pa un cambio den paradigma y pa diseña
un combinacion integrativo di servicionan pa combati violencia
domestico na Aruba.

Durante Charlene su periodo na Universidad di Aruba, el a haci su
periodo di practica na Departamento di Asuntonan Social, Horizon
Institute na Rotterdam trahando como lider di grupo cu muchanan
entre 9 - 12 aña cu problema di comportacion severo.
El a haci un pasantia tambe na CEDHEM.

Sra. Eugene, kende a presidi e ceremonia di graduacion a extende
su gratitut na sra. Noami Maduro, sra. Manouska Sosrojoed, sra.
Sandra Brown y ara. Jamilia Hoevertz - Kock pa provee e guia den
e formacion di Charlene Bontekoe p’asina e por a alcansa e profil
di e graduado.

Charlene ta trahado acualmente den e industria hotelero, e ta
tuma cada oportunidad pa educa su coleganan tocante violencia
domestico. Su meta ta pa reduci e indice di violencia domestico na
Aruba.

Nos ta desea Charlene tur cos bon awor cu e ta continua pa lucha p’e
hende muhernan cu nan derechonan humano y dignidad ta wordo
afecta dor di violencia domestico.