Page 53 - MIN ON OCT 19, 2015

Proyecto Scolnan Saludabel ta reactiva, proyecto piloto ta
caba na 2016

Publication: Monday, 19 October 2015. Categoria: General

ORANJESTAD (AAN): Miriam Baiz ta encarga cu e “stuurgroep” pa cu implementacion di e
proyecto Scolnan Saludabel cu a wordo reactiva pa ex-minister di salubridad, dr. Richard Visser
y actualmente tin cinco scol piloto trahando riba nan metanan. E proyecto piloto ta caba na aña
2016.

Baiz a splica den un entrevista diabierna cu e idea pa e proyecto aki, cu conoce diferente version
mundialmente, a wordo crea pa World Health Organization y Pan American Health Organization
basa riba e declaracion di UNESCO di 1997 cu ta bisa cu e mucha tin derecho di ricibi educacion
den un ambiente saludabel.

Consecuentemente, a organisa diferente conferencia riba e topico y di Departamento di Salud
Publico di Aruba tabatin un grupo cu a atende varios di e conferencianan internacional aki. E

programa cu ta wordo implementa na diferente parti di mundo por ehempel na Latino America
yama Escuelas Promotores de la Salud, na Hulanda e yama Gezonde School y na Merca Healthy
School Concepts cu a haya un extra boost pa medio di e envolvimento grandi di parti di casa di e
presidente Mericano, esta Michelle Obama.
Dr. Visser a lanta e idea y concept bek y kier a implement’e pasobra e tabata un hende cu ta kere
hopi den e parti preventivo, Miriam Baiz a bisa. Scolnan Saludabel ta hustamente dirigi riba
prevencion, cuminsando for di kleuterschoolnan caba. E programa ta dirigi riba cambio di
comportacion di e muchanan pa asina nan crece como adultonan cu ta comporta nan mes tambe
na un manera responsabel.

E programa mester desemboca den un aanpak duradero y sostenibel pa asina yega na un
comunidad mas saludabel.

Baiz a bisa cu den e scol mes e introduccion di e proyecto lo resulta den muchanan mas
saludabel, muchanan cu ta sinti nan mes sigur na scol, ta sinti nan bon en general, nan ta
contento y, consecuentemente ta resulta den studiantenan cu ta presta miho. E conclusion aki a
sali di hopi investigacion.

E ta un situacion win-win, Baiz a remarca, no tin nada di perde; e unico cos cu mester ta e
colaboracion y bon cooperacion den e scol completo, incluyendo e cabesante, docentenan,
personal di cuido y di sosten, como un team.