Page 47 - MIN TTC JUNE 9

Minister y Asociacion di chofernan di autobus a reuni largo
na San Nicolas

Publication: Tuesday, 9 June 2015. Categoria: General

ORANJESTAD (AAN) – For di fuente fidedigno, Matutino DIARIO a ricibi informacion cu,
Diadomingo cu a pasa, e asociacion di chofernan di autobus (of bus chikito) a reuni cu Minister
di Transporte, na San Nicolas pa varios ora.

Tin indicacion cu e reunion tabata uno basta largo, segun nos por a compronde, pasobra tabata
tin hopi punto di agenda cu a wordo trata.

PARADA PA BUS:

E chofernan di bus chikito, segun e informacion, a elabora como un aspecto cardinal, riba e
necesidad di un parada di bus pasobra unda nan ta stop pa baha y subi pasahero na
Wilhelminastraat, pariba di kerki, no ta funciona bon. Tin dianan cu tin asina tanto auto staciona
cu otro vehiculonan no ta haya espacio y mas tanto e busnan di Santa Cruz cu tin menos, no ta
haya lugar.

Tin indicacion cu e mandatario a bin cu un proposicion pa traha un parada pa nan unda
Brenchie’s tabata antes. Pero, aparentemente, e chofernan a splica e mandatario cu akinan ta hopi
dificil pa bin cu un parada di bus, pasobra tin hopi pasahero cu ta cana for di e terminal di
Arubus te e actual parada, y hopi di nan ta hende grandi cu ta cansa lihe y lo bira hopi pisa pa
nan cana algun cuadra extra pariba. Nan mester di bus chikito pasobra Arubus no ta yega tur
caminda, y ademas si nan no tin smart card nan tin cu paga 4 florin, mientras cu un bus chikito te
ainda ta costa 2.50 pa trip.

Ademas, ta asina cu e autobusnan tog tin cu move di nan actual parada. Esaki debi cu e caya na
skina pa bay den Censo lo bira di dos via, y e caminda lo bira hopi mas small.

TARIFA NOBO:

Den un reunion cu tabata tin cu e minister algun dia atras, el a propone e tarifa di 3.50 florin,
pero esaki no por bay door ainda, pasobra prome mester haci un evaluacion di cuanto biaha e
salario minimo a subi, mientras cu e chofernan di Arubus no a aumenta nan prijs pa añanan.

Di otro banda, nan ta hopi conciente cu mayoria di nan usuarionan ta trahadornan cu ta biba di
salario minimo. Ya caba tin algun cu a mustra na un par di chofer con e suma mensual pa paga
transporte publico lo aumenta pa nan na momento cu e tarifa bira 3.50 fls. Tin indicacion cu
varios chofer ta haya cu 3 florin por yuda ambos, pero esaki ta algo cu no ta concreto ainda.