Page 2 - AHATA

2 LOCAL AWEMainta
Inclusion no ta caridad e ta bon maneho
NA Aruba, nos gusta yama nos mes un sociedad amabel y
inclusivo. Nos ta zwaai nos banderanan, celebra comunidad,
y papia cu orguyo di oportunidad pa tur hende. Pero ora ta
trata di hendenan cu limitacion — sea fisico of mental —
nos historial ta conta un otro storia.
E berdad ta incomodo: Mucho negoshi ainda ta ignora un
segmento di e poblacion cu ta cla, dispuesto y capaz pa
traha. No pa falta di habilidad of empuhe, sino pa motibo
di suposicionnan anticua, bareranan fisico, y un cultura di
dunamento di trabou cu silenciosamente ta inclina pa e
escogencia “mas facil” — tuma un hende sin un limitacion
na trabou.
Esaki no ta solamente tocante husticia; E ta tocante
sentido comun economico. Un trabou ta mas cu un transfer-
encia di salario — e ta independencia, dignidad, y e habil-
idad pa participa plenamente den sociedad. Ora negoshinan
cera porta pa hendenan cu limitacion, nan no ta solamente
nengando nan un entrada; nan ta nengando nan autosufi-
ciencia. Y esey tin un efecto domino — mas dependencia riba
programanan social, menos poder di compra pa consum-
idor, y un oportunidad perdi pa probecha di un forsa laboral
talentoso y motiva.
Globalmente, companianan cu ta brasa inclusion di hende cu
limitacion no ta solamente haya bon ‘review’ — nan ta haya
resultado. Estudionan ta mustra cu luganan di trabou inclu-
sivo ta beneficia di lealtad mas halto di empleado, perspec-
tivanan mas amplio, y miho solucion pa problema. Na Aruba,
Diahuebs, 14 Augustus 2025
nos no por afford di desperdicia talento. Nos poblacion ta
chikito, nos economia ta keto, y cada par di man capaz ta
conta.
Ta inclusivo no semper ta nifica renobacionnan caro of
restructuracion grandi. Tin biaha e ta asina simpel manera
adapta orario, revisa e rolnan di trabou, of duna training. E
costo pa haci cambionan chikito no ta nada compara cu e
beneficionan a largo plaso di un empleado dedica.
Ta ora pa doñonan di negoshi revisa kico ta nifica ser parti
di e comunidad. Integracion no ta un fabor; E ta un respon-
sabilidad. Y francamente, e ta un inversion inteligente.
E hendenan cu limitacion di Aruba no ta pidiendo trato
special. Nan ta pidiendo e mesun chens cu tur otro hende
pa gana nan pan, contribui na economia, y para riba nan
propio pianan — sea e pianan ey ta di nan mes of wielnan di
un rolstoel.
Un comunidad fuerte no ta midi su exito na con e ta trata
esunnan mas privilegia. E ta midi’e na con e ta trata esunnan
cu ta enfrenta e subida mas pisa. E negoshinan di Aruba tin
e poder pa lidera e cambio — no cu limosna, sino cu oferta
di trabou y portanan habri.
Si nos kier un isla berdaderamente inclusivo, nos no por
sigui laga hende capaz un banda. Ta ora pa nos move di
papia tocante oportunidad pa tur hende, pa di berdad dun’e.
Pasobra integracion no ta bon solamente pa e individuo — e
ta bon pa henter e isla.