Page 9 - AM210422

Diahuebs, 22 April 2021 AWEMainta 9

Minister Armando Rudy Lampe na SKOA:

“Mi no tin motibo pa rectifica

y mi no a inventa nada”

DIAMARS Minister di partido RED Democratico
Armando Rudy Lampe tabata presente den conferencia
di e partido. E mandatario a papia di dos tema di
cual uno tabata Cannabis y e exigencia di SKOA p’e
rectifica su declaracion, algo cu el a bisa cu no tin base
pa haci.
Hopi breve e mandatario a bay riba e tema di SKOA y
rectificacion pidi pa motibo e ta kere cu nan demanda
no tin base.

Su abogado a informa SKOA caba cu lo no tin
rectificacion, pasobra no tin motibo p’esaki. “Loke
cu mi a trece dilanti, tur hende por lesa e sentencia di
Hues, mi no a inventa nada. Ta Hues a duna sentencia
unda claramente e ta bisa cu trahadornan di SKOA a
wordo tuma na trabou contra ley. Esey ta un sentencia
di Hues.”
Den e relato financiero di SKOA, cu nan mesun
palabranan, a pone cu nan no por cumpli cu nan
obligacionnan fiscal na pais Aruba.

“Tampoco mi a inventa e palabranan aki y ta poni
den nan relato anual, cu nan tin un debe miyonario
cu pais Aruba. Tur hende por verifica loke mi a trece
dilanti. Pa tal motibo mi no tin motibo pa rectifica.”
Tambe e mandatario a papia brevemente riba e
tema di Cannabis, mirando cu diamars tabata e dia
internacional n’e movecion pro Cannabis.
El a papia specialmente pa personanan di riba 60,
kendenan ta sufri di hopi dolor. Esaki ta haci cu hopi
hende di e edad aki rond mundo ta uza Cannabis. Esaki
ta pa suavisa nan dolornan, pero aki na Aruba e ta algo
cu a wordo criminalisa. A pesar cu e ser humano tin
derecho di escogencia.

“Un persona riba 60 aña cu uza Cannabis pa anda
cu su dolornan, ta wordo considera un criminal.
Lamentablemente aki na Aruba ainda no a mira luz di
dia di e ley di descriminalizacion di Cannabis. Ainda
si un hende grandi cu ta uza e mata aki pa alivia su
dolornan, e ta wordo criminalisa.
P’esey RED a start e lucha pa caba cu e prohibicion
y criminalisacion cu tin di Cabnnabis. E lucha lo
continua”, Armando Rudy Lampe a garantisa.