Page 31 - ATA

E motibo di e proyecto aki ta pa motibo cu e barconan crucero tur aña ta crece mas,
nan no ta bira mas profundo, pero si den largura. Y den luna di Mei, Aruba ta bay haya
barconan cu te cu aworaki nunca a yega di bin Aruba, nan ta barconan di Freedom
Class, y nan tin un largura di 339 meter.

E barconan aki, segun nautical manager di APA, por drenta Aruba, pero e companianan
di crucero, den e caso aki, Royal Caribbean Cruise Lines, a bisa cu nan ta prefera pa
APA haci algun trabaonan acerca, y nan kier pa nan realiza e trabaonan di mantencion,
cu den e canal tur caminda mester tin un profundidad minimo di 12 meter.

Sr. Figaroa a indica cu e canal aki a wordo prepara mas cu 60 aña pasa, mas o menos
40 aña pasa a haci trabaonan pa ora a bin cu containers, pero nan no a haci hopi mas
trabao desde e tempo ey. Pesey actualmente e trabao a bira hopi mas importante, no
solamente pa e barco cu ta bin pero nan kier pa tur caminda den nan canalnan ta por lo
menos di 12 meter.

Segun Sr. Figaroa, aki tres aña nan lo bay haci un trabao hopi mas grandi, e ora ey si
nan ta bay coba y kita, pa motibo cu barconan mas grandi ainda lo bishita Aruba, cu ta
trata di barconan cu ta cay den clase Oasis, cu ta di 360 meter. No ta bay tin un
problema di profundidad, pasobra esaki lo keda casi mescos, pero e problema lo ta ora
nan mester lora. Tin camindanan na unda cu barconan crusero tin miedo, pa motibo cu
e barco ta asina grandi, cu ora e lora e por dal contra cierto cosnan. Nan ta dispuesto
pa bin Aruba na aña 2020 – 2021, kiermen APA mester ta prepara.

E barco cu ta bin haci e trabao ta na caminda pa Aruba, e compania cu a haya e trabao
aki, ta un compania Hulandes, cu a duna APA e mihor prijs ora nan a tene e destaho
publico, na unda varios compania internacional y local a participa. E barco ta yega
Aruba diasabra awo, y pa cuminsamento di otro siman, e trabaonan lo cuminsa.

Sr. Figaroa a enfatiza cu ora nan a cuminsa prepara e proyecto aki, nan a pensa na
prome instante cu e material cu nan ta bay saca, nan lo por a pone un caminda pa
wordo uza, manera banda di Bushiri of un caminda cu ta safe cu por ta nan mes of
Gobierno lo por haci uso di dje. A resulta cu e material cu nan ta bay saca ta hopi
mas grandi cu nan a proyecta, y tin chens cu esaki no ta den bon condicion pa wordo
uza. Kiermen APA a haya un reto nan dilanti riba kico nan ta bay haci cu e material aki,
cu tin un volumen hopi grandi.