Page 2 - AHATA

2 LOCAL AWEMainta
Politica Ta Contamina Aruba
Con Amargura y Hipocresia Ta Venena Nos Isla
ARUBA ta yama su mes One Happy Island — pero ultimo tempo
e ta parce mas One Angry Island. E clima politico a bira un cuna
pa amargura, y amargura tin un producto secundario peligroso:
hipocresia.
Tur hende ta mir'e. Hende ta grita pa "honestidad" for di e partido
cu nan ta odia, mientras nan ta cera wowo ora nan mesun partido
ta hunga sushi. Nos ta exigi husticia ora e lider di e partido
contrario wordo acusa di corupcion, pero nos ta busca pa sconde
ora ta nos politico faborito ta wordo gara cu man den saco di
pueblo. Esaki no ta djis un comportacion inconsistente — esaki
ta bancarota moral.
Amargura ta alimenta tur esaki. En bes di discuti riba maneho,
nos ta ataca hende. En bes di resolve problema, nos ta cria
rencor. Cada eleccion ta bira menos tocante un vision pa futuro
di Aruba y mas tocante castiga e partido contrario. Y mientras
nos ta ocupa ta bringa y dividi, e problemanan ta acumula: costo
di bida halto, escases di vivienda, daño na nos medio ambiente y
e perdida lento di confiansa den gobierno.
E hipocresia politico ta hundo. Den discursonan nos ta papia di
"union", pero riba rednan social nos ta plama division. Nos ta
bisa cu nos ta defende democracia, pero solamente ora e ta fabo-
rabel pa nos. Hipocresia den politica no ta inocente — e ta come
na e fundeshi di bon gobernacion. Ora lidernan sa cu votadonan
lo sigui hustifica nan mentira, deroche y interes propio basta nan
bisti e color corecto, nan no ta traha pa nos mas, sino pa nan
mes.
Dialuna, 11 Augustus 2025
E berdad ta: Aruba no por sobrevivi si nos sigui hunga e wega aki.
Nos isla ta demasiado chikito pa bringamento sin fin y pa midi cu
dos midi. Nos mester di un cultura politico unda tur lider — sin
importa partido — ta wordo huzga cu e mesun midí di honest-
idad, eficiencia y dedicacion pa sirbi. Y esey ta cuminsa cu nos,
e pueblo.
Nos mester stop di alimenta amargura. Nos mester stop di recom-
pensa hipocresia.
No ta suficiente pa señala solamente e foutnan di e partido
contrario — nos mester tin e curashi tambe pa admiti ora nos
mesun partido faya. Nos mester preocupa mas pa futuro di Aruba
cu pa e carera di un solo politico.
Esaki no ta debilidad. Esaki ta forsa. Exigi normanan husto di tur
hende no ta dividi nos — e ta obliga e clase politico pa respeta
nos. Imagina bo cu e proximo biaha cu un politico gaña, tur
Arubiano yam'e pa duna cuenta, sin importa partido. Eynan so
berdadero cambio ta cuminsa.
Nos grandinan a lanta e isla aki cu trabou duro y cooperacion,
no cu guera politico chikito. Si di berdad nos ta stima Aruba,
nos ta scoge e mesun caminda ey. Politica mester ta e motor di
progreso, no e veneno cu ta destrui nos union.
Laga nos cambia amargura pa un vision. Laga nos mata hipo-
cresia prome cu e mata nos democracia. Y laga nos corda cu e
beradero colornan di Aruba no ta cora, geel of berde — sino e
blauw, geel, cora y blanco di e bandera cu nos tur ta comparti.