Page 8 - AWE-3005

Dialuna 30 di Mei 2022

COMUNIDAD

Un ehempel di lealtad y disciplina na trabou
MetaCorp a celebra cu empleadonan fiel

E prestigioso compania MetaCorp hunto cu su subsidiarionan
ATCO Aruba y EcoTech Freezone recientemente a celebra y
honra dos empleado cu a cumpli respectivamente 45 aña y 25
aña di servicio. Un logro cu sigur ta di admira y aplaudi, cu ta
bisa algo di tanto e trahado y e dunado di trabao. A celebra cu e
hubilarionan durante un ceremonia special na Balashi Beergarden,
den presencia di colega y algun pensionado.
Eddie de Veer, CEO di MetaCorp y Guus Slabbekoorn, CFO
di MetaCorp a presenta na e evento pa personalmente felicita e
hubilarionan y alabes gradici nan pa e añanan di servicio. Den
discurso di De Veer, el a subraya e importancia di tin empleadonan
leal, cu disciplina y cu e compromiso pa sigui hiba e compania
padilanti. MetaCorp ta consciente cu ta danki na empleadonan
fiel asina, cu e compania a surpasa 100 aña di existencia y ta cla
pa sigui crece y desaroya.
Tocante Theodoor Wernet- 45 aña
Theo a cuminsa cu Victoria Bottling Company na aña 1977 y
despues a sigui na Tropical Bottling Company, na New York
Laundry N.V. y awor e ta trahando na EcoTech Freezone. E ta
un tremendo empleado, cu semper ta cumpli cu su tareanan,
ta un persona hopi puntual y honesto. E semper ta cla pa yuda
su coleganan, te hasta si no ta parti di su trabao. E ta un bon
ehempel di loke ta un bon colega. Semper e tin un sugerencia
con pa haci e trabao mas eficiente. Semper e ta contento y ta
yega trabao cu e mesun entusiasmo y disciplina, mescos cu ta su
prome dia di trabao. “Tur e bunita cualidadnan aki di Theo, nos
mester pa nos mes como colega, trahado y como hende”, asina
Edwards Jimenez, gerente di EcoTech Freezone, a conta durante
su discurso.
Tocante Rozina Nava – Fradl 25 aña

Rozina a inicia su carera impresionante den MetaCorp na aña
1997, unda el a traha e prome diesun añanan. Aki Rozina a
traha entre otro den e Internal Audit Department. Na 2009, a
promove Rozina como director financiero di ATCO, cu e tempo
ey tabata un compania grandi consistiendo di Ecotech/Recycling-
Operations/Garage-Batch/Blockplant.Na 2010 a converti e
diferente departamentonan den un N.V. separa, cada un cu nan
mesun director financiero, pa cual a apunta Rozina pa sigui cu
ATCO Concrete Products N.V.Na aña 2021a haci otro cambio,
Rozina a bira director financiero di ATCO Aruba N.V., Ecotech
N.V., EcoTech Freezone y EcoGas. Robert Carrasquero, gerente
di e grupo di compania aki a felicita Rozina den su discurso. E
ta consider’e un colega pasiona cu su trabao, responsabel, un
persona cu bo por conta riba dje na tur momento y e ta traha
tremendo como un parti di e ekipo.
MetaCorp hunto cu Ecotech, Ecotech Freezone, ATCO Aruba y
EcoGas ta felicita y gradici Rozina y Theodoor pa tur nan añanan
di bon servicio y ta desea nan hopi aña mas di servicio y bon
salud.

8