Page 54 - MIN ON
P. 54
Pa por implementa scolnan saludabel, e ta rekeri un cooperacion intensivo y extenso di
diferente partner. Scolnan, docentenan, directivanan, mayor y muchanan tambe mester
coopera, banda di esaki e instancianan oficial mediante di e ‘stuurgroep’ cu ta consisti di
Departamento di Asuntonan Social, Departamento di Enseñansa y Departamento di
Salud Publico lo guia e scolnan basico den e proceso pa conberti nan den Scolnan
Saludabel. Minister Schwengle ta contento cu tin un programa cu ta funciona bon den 4
pa 8 scol y cu e lo bay tin un efecto hopi positivo riba nos muchanan, tur investigacion
di WHO esta Organisacion Mundial di Salud ta bisa esey. “Mester tin un tiki pasenshi
pasobra esaki ta un programa extenso y grandi di prevencion”, segun e mandatario. Lo
por mira e fruto di esaki te cu aki 15 pa 30 aña, pero ta un inversion cu aki na Aruba
mester haci. Si percura pe yiunan di tera cu ta biniendo y cu ta esub nan cu lo bira e
futuro lidernan, e futuro ciudadano di e pais aki, mester inverti den nan. Kiermen si siña
nan desde chikito pa biba un bida saludabel ora nan bira adulto nan lo bay tin un bida
saludabel.
Por mira cu e poblacion lo ta mas sano y lo tin menos problema di sobrepeso y obesidad.
Tambe lo mira cu e enfermedadnan cronico lo reduci drasticamente y lo tin tur sorto di
efecto positivo. No solamente na e calidad di bida riba nivel individual, pero tambe como
pais den e maneho di salubridad. Pasobra lo por mira cu e gastonan lo bira hopi mas
controlabel na momento cu haci uzo di e programa aki.
